Չնայած տեղեկություններին, որ Նախիջեւանի ուղղությամբ Ադրբեջանի կողմից զորքերի եւ զինտեխնիկայի կուտակումներ են նկատվում, Հայաստանի կողմից անվտանգության նկատառումներով ՀԱՊԿ-ին դիմելու անհրաժեշտություն չկա: Այս մասին այսօր լրագրողների հետ զրույցում ասաց ՀՀ պաշպանության փոխնախարար Արտակ Զաքարյանը: «Ադրբեջանի կողմից սպառազինության կուտակումը նորություն չէ, այդ թվում՝ Նախիջեւանի հատվածում: Ամեն ինչ մեր վերահսկողության տակ է»,-վստահեցրեց նա:
Այնուհետեւ անդրադարձավ 200 միլիոն դոլար վարկի շրջանակում ՌԴ-ից ՀՀ-ին մատակարարվող սպառազինությանը՝ ասելով, որ նախատեսվածի մեծ մասը մատակարարվել է, գործընթացը շարունակվում է:
Ինչ վերաբերում է նոր խմբաքանակին, փոխնախարարի խոսքով. «Ամեն ինչ իր ժամանակին կիմանաք»:
Արտակ Զաքարյանը մեկնաբանեց նաեւ օրերս գրանցված միջադեպը, երբ ադրբեջանական կողմը կրակ էր բացել ԵԱՀԿ դիտարկման ժամանակ. «Առաջին անգամ չէ, որ նրանք ԵԱՀԿ մոնիթորինգի ընթացքում էլ են խախտում հրադադարի ռեժիմը: Միջադեպը խոսում է այն մասին, որ Ադրբեջանը շարունակաբար խախտում է հրադադարի ռեժիմը»:
Լուիզա ՍՈՒՔԻԱՍՅԱՆ
