Հռոդոսում հպարտանում են, որ կղզու անունը կապվում է լեգենդար Pink Floyd ռոք խմբի անվան հետ: Ասում են` հենց կղզում գտնվող Լինդոս քաղաք 70-ականներին այցելությունից հետո է ծնվել նրանց The Dark Side of the Moon ալբոմը: Հայրենիք վերադառնալով` ռոք երաժիշտները հարցով են պատասխանել ալբոմի վերնագրի վերաբերյալ լրագրողների հարցին. «Դուք երբեւէ տեսե՞լ եք Լինդոսի լիալուսինը»: Հռոդոսյան էքսկուրսավարները փաստում են, որ ոչ այնքան հայտնի Լինդոսում հենց Pink Floyd-ի շնորհիվ է զբոսաշրջային բում սկսվել, այնուհետեւ սկսել են Հռոդոս այցելել այլ ռոք խմբեր, այդ թվում` Led Zeppelin-ը:
Այս տարվա հունիսին Pink Floyd-ի անդամ Դեյվիդ Գիլմորի դստեր հարսանիքը նույնպես կայացավ կղզում: Հռոդոսի չքնաղ բնությունը եւ ծովափերը գրավում են ոչ միայն աստղերին, հասարակ մահկանացուները նույնպես սիրում են հանգստանալ: Իմիջիայլոց, ի տարբերություն Հայաստանի, Հռոդոսում չկան մասնավոր լողափեր: Յուրաքանչյուր ոք կարող է ազատորեն հանգստանալ ամենաշքեղ հյուրանոցի դիմաց գտնվող լողափում, քանի որ լողափերը պետության սեփականությունն են եւ ոչ թե օլիգարխների, գեներալների կամ ինչ-ինչ չինովնիկների:
Լուսանկարը`
ԳՈՀԱՐ ՀԱԿՈԲՅԱՆԻ
«Առավոտ»
31.08.2017
