Հայաստանի տնտեսության գրեթե բոլոր ոլորտներում աճ է գրանցվել: Այս մասին այսօր կառավարության նիստից հետո լրագրողների հետ ճեպազրույցում վստահեցրեց տնտեսական զարգացման եւ ներդրումների նախարար Սուրեն Կարայանը: Թե որքան է կազմում ներդրումների ծավալը եւ այդ ուղղությամբ ինչ զարգացումներ կան, նախարարը վստահեցրեց՝ այդ տեղեկությունները հանրությանը կներկայացնեն սեպտեմբերին:
Լրագրողներից մեկի այն հարցին, թե ինչպե՞ս է տնտեսապես ակտիվ բնակչության նվազումն ազդում տնտեսական ցուցանիշների վրա, ընդ որում՝ ըստ ազգային վիճակագրական ծառայության, 2012-2016 թվերին Հայաստանի տնտեսապես ակտիվ բնակչությունը 200 հազարով կրճատվել է, իսկ զբաղվածների թիվը՝ նվազել է 160 հազարով, Կարայանը պատասխանեց, որ ճիշտ չէ 2012-ի ցուցանիշներն էլ ներկայացնել. «Դրանք տարբեր մակրոտնտեսական ցուցանիշներ են, եւ ճիշտ չէ միմյանց հետ կապել:
Ես ճիշտ չեմ համարում, որ մենք մեկնաբանենք, թե 2012-2016 թվականների ընթացքում ինչքանով է կրճատվել: Ես կոչ կանեմ, որ մենք անդրադառնանք վերջին տարվա ընթացքում տեղի ունեցածին»:
Հիշեցնենք, որ ԱՎԾ-ի ցուցանիշներով, տնտեսապես ակտիվ բնակչության քանակը նվազել է նաեւ այս տարի:
Կարայանը կրկին հիշեցրեց՝ նոր կառավարության ժամանակ նոր աշխատատեղեր են ստեղծվում. «Եթե մենք ուզում ենք խոսել տնտեսության զարգացման ուղղությունների վերաբերյալ, պետք է վերցնենք այն մակրոտնտեսական ցուցանիշները, որոնք վերաբերում են տնտեսական զարգացմանը: Դա առաջին հերթին ՀՆԱ-ի աճն է, արտահանման, արդյունաբերության եւ այլ ցուցանիշները»:
Մանրամասն՝ տեսանյութում
Ինչ վերաբերում է կառավարության աշխատանքին եւ տնտեսական աճին, ապա Կարայանը մատնացույց արեց արդյունաբերության աճի տեմպերը. «Երբեւիցե դուք տեսե՞լ եք, որ նման տիպի արդյունաբերության աճ լինի, արտահանման աճ լինի»:
Նշենք, որ այս տարվա հունվար-հուլիսին նախորդ տարվա նույն ժամանակահատվածի համեմատ՝ արդյունաբերության աճը կազմել է 12.7%, արտահանումը՝ 21.6%:
Արդյոք շարքային քաղաքացու կենսամակարդակի վրա ազդում է այդ աճը, նախարարն այսպես մեկնաբանեց՝ «Այո, ստեղծվել են նոր աշխատատեղեր, զբոսաշրջության ու արդյունաբերության մեծ աճ ունենք: Եվ այդ բոլոր տենդենցները չեն կարող չնկատվել եւ չազդել մեր բնակչության վրա»:
Ինչ վերաբերում է Թուրքիայի՝ ԵԱՏՄ-ին անդամակցելու հնարավորությանը, պարոն Կարայանն ասաց, որ ԵԱՏՄ-ում որոշումները կայացնում են կոնսենսուսի սկզբունքով:
Մանրամասն՝ տեսանյութում
Նելլի ԲԱԲԱՅԱՆ
