Այս օրենքն ի՞նչ է տալու հայկական կինոյին. սա էր օգոստոսի 29-ի երեկոյան ամենահաճախն ու ամենաբարձրը հնչող հարցը Հայաստանի մշակույթի նախարարության խորհրդակցությունների սենյակում։ Հայաստանի կինոգործիչները հրավիրված էին կինոյի դաշտը կարգավորող օրենքի նախագծի նախնական տարբերակին առայժմ ծանոթանալու ( մեկ շաբաթում նրանք պետք է ներկայացնեն իրենց գրավոր առաջարկությունները, իսկ օրենքը պետք է ընդունվի մինչև տարեվերջ)։
«Օրենքն ինչ է տալու հայկական կինոյի՞ն. առաջին հերթին՝ կինոարտադրության ենթակառույցների զարգացման հնարավորություն, ինչն, անշուշտ, խթանելու է հայրենական կինոյի զարգացումը։ Ես շատ ուրախ եմ, որ օրինագիծն անվանեցիք «բիզնես-պրոեկտ»։ Այո′, սա հրաշալի նախագիծ է, այս օրենքը խթանելու է կինոյի զարգացումը, իսկ կուտակված գումարն ամբողջովին և անընդհատ ուղղվելու է հայկական կինոարտադրությանը» ,- ասաց նախարար Արմեն Ամիրյանը։
Նախագիծը նախարարի հետ կինոգործիչներին ներկայացրին Հայաստանի ազգային կինոկենտրոնի գեղարվեստական ղեկավար-ֆիլմ հանձնակատար Արսեն Բաղդասարյանը և օրենքի նախագծի իրավական խորհրդատու Կարեն Ֆիդանյանը։
Օրենքը կարգավորելու է կինոյի դաշտում պետական քաղաքականության սկզբունքները, պետական աջակցության նպատակներն ու ձևերը, նոր ստեղծվող կառույցի՝ ֆիլմերի հանձնաժողովի լիազորություններն ու պարտականությունները, ներդրումների երաշխավորումը, ֆիլմի ցուցադրության, պահպանման, լեզվի ( բնականաբար, հայերենի) պաշտպանությունը, կինոդաշտում թափանցիկ, իրավահավասար, հաշվետու աշխատանքը և այլն։
Հայաստանում օտարերկրյա կինոներդրումները խթանող կարևորագույն դրույթներ են ամրագրված նախագծում, ըստ որոնց, մեր երկրում առնվազն 100 միլիոն դրամի օտարերկրյա կինոներդրում անելու դեպքում պետությունը ներդրողին փոխհատուցում է նրա գումարի 20 տոկոսը։ Ի տարբերություն այլ երկրների, Հայաստանը ( աշխարհում առաջին երկիրը), այդ փոխհատուցումը կկատարի ոչ թե մեկ տարի անց, այլ անհրաժեշտ փաստաթղթերը ձևակերպելուց հետո անմիջապես։
– Այսինքն, պետությունը կինոբիզնե՞ս է անում,-հարցրին։
– Ո′չ, պետությունը կինոարտադրության հնարավորություններ է ստեղծում, -պատասխանեց Արսեն Բաղդասարյանը։
– Ներդրումների գոնե մեկ-երկու տոկոսը գոնե կուղղվի՞ Հայաստանի կինոարտադրությանը։
-Մեկ կամ երկու տոկոսը ո՞րն է,- զարմացավ Արմեն Ամիրյանը,- հարյո′ւր տոկոսն է ներդրվելու Հայաստանի կինոարտադրության մեջ։
Նախարարը կինոգործիչներին տեղեկացրեց, որ կինոյին առնչվող նաև ենթաօրենսդրական և այլ ակտեր են մշակվում ( օրինակ, ֆիլմ հանձնաժողովի կանոնադրությունը), կինոցանցը կարգավորելու, կինոթատրոնների թիվն ավելացնելու, կրթական նոր ծրագրերի նախաձեռնություններ կան… Այս ամենը զուգահեռ իրականացնելով՝ կառողջանա և կզարգանա Հայաստանի կինոն։ Ինչ վերաբերում է օրենքի՝ առաջարկվող նախագծին.
« Մեր կինոարտադրության պայմանները բարելավելու, այն զարգացնելու քաղաքական որոշումը կայացված է։ Միևնույն է՝ իրականացնելու ենք այդ որոշումը։ Ուրեմն, եկեք միասին իրագործենք»։
