«Սասնա ծռերի» գործով դատական նիստի ավարտին այսօր ամբաստանյալների պաշտպաններից փաստաբան Լուսինե Սահակյանը լրագրողների հետ զրույցում մեկնաբանեց դեպքը, երբ որպես նոր հանրային պաշտպան ներգրավված Գարեգին Մարգարյանը չլքեց նիստերի դահլիճը՝ չնայած այն փաստին, որ ամբաստանյալներ Արեգ Կյուրեղյանն ու Սմբատ Բարսեղյանը հրաժարվեցին նրա ծառայություններից:
«Դատարանի՝ նրան ներգրավելու որոշումն ակնհայտ ապօրինի էր: Ստացվում է, որ հանրային պաշտպանները գալու են նստեն դահլիճում, իրենց աշխատանքը չկատարեն, բայց վարձատրվեն պետության կողմից: Սա անընդունելի է»,-համոզմունք հայտնեց Լուսինե Սահակյանը:
Նա համաձայն չէ Գարեգին Մարգարյանի այն պնդման հետ, թե ինքն իրավունք չունի հրաժարվել դատարանի՝ իրեն ներգրավելու որոշումից: «Այդպես չէ, դատարանը չի կարող ցանկացած որոշում կայացնել, մենք էլ ի կատար ածենք: Կարող է՝ որոշում է, որ տունս պետք է իրեն նվիրեմ…»,-ասաց Լուսինե Սահակյանը, ապա հավելեց. «Նա պետք է լքեր դատարանի դահլիճը: Այստեղ փաստաբանի վարքականոնի խախտում կա»:
Լուսինե Սահակյանը կարծիք հայտնեց, որ Մարգարյանի այդ պահվածքը պայմանավորված է հանրային պաշտպանի գրասենյակի հրահանգով, եւ հանրային պաշտպաններն այս առումով աշխատանք կորցնելու խնդիր ունեն:
Լուիզա ՍՈՒՔԻԱՍՅԱՆ
