Ռուսաստանի նախագահ Վլադիմիր Պուտինը շնորհավորական ուղերձ է հղել Հայաստանի նախագահ Սերժ Սարգսյանին երկու երկրների միջև Բարեկամության, համագործակցության և փոխօգնության մասին պայմանագրի 20-րդ տարեդարձի կապակցությամբ:
Նամակում Պուտինը հիշատակել է հայ-ռուսական հարաբերությունների հին և հարուստ պատմությունը, որի համար հիմք են ծառայել երկու երկրների միջև բարեկամության և փոխադարձ հարգանքի ամուր կապերը:
«1997թ. պայմանագիրը սկիզբ դրեց Ռուսաստանի և Հայաստանի միջև միջպետական կապերի ժամանակակից փուլին: Այդ կարևոր փաստաթղթի ստորագրումը պայմաններ ստեղծեց քաղաքական երկխոսության ընդլայնման, առևտրատնտեսական, գիտատեխնիկական, հումանիտար և այլ ոլորտներում որակյալ երկկողմ համագործակցության համար»,- ընդգծել է Ռուսաստանի նախագահը:
Պուտինը բարձր է գնահատել հայ-ռուսական հարաբերությունների զարգացումը, որոնք վերջին երկու տասնամյակում միութենական նոր մակարդակի են դուրս եկել. Մոսկվան և Երևանը բեղուն համագործակցում են եվրասիական ինտեգրացիոն գործընթացների շրջանակում, համակագրում են ջանքերը հանուն տարածաշրջանային անվտանգության և կայունության:
Ռուսաստանի նախագահը հաստատել է պատրաստակամությունը շարունակել ակտիվ համատեղ աշխատանքը հայ-ռուսական հարաբերությունների ամբողջ համալիրի հետագա ընդլայնման գործում՝ ի շահ երկու երկրների եղբայրական ժողովուրդների:
Պատրաստեց՝ Վիկտորյա ԱՆԴՐԵԱՍՅԱՆԸ
