«Հոգլանդն այդ հայտարարությամբ հիշեցրեց ՀՀ-ին եւ ավելի ինքնուրույն քաղաքականություն վարող Ռուսաստանին, որ Արցախյան հակամարտությունը դիտարկվում է եռանախագահների միջեւ, այսինքն, այն միայն Ռուսաստանի եւ Հայաստանի խնդիր չէ»,-«Փաստարկ» մամուլի ակումբում այսօր անդրադառնալով ԵԱՀԿ Մինսկի խմբի արդեն նախկին ամերիկացի համանախագահ Ռիչարդ Հոգլանդի վերջին հայտարարությանը, ասաց քաղաքագետ Արա Պապյանը:
Նա նշեց՝ միակ հարթակը, որտեղ ԱՄՆ-ի եւ ՌԴ-ի միջեւ գործակցություն կա, Արցախի հարցն է:
Անդրադառնալով առաջիկայում ՀՀ եւ Ադրբեջանի նախագահների հնարավոր հանդիպմանը՝ նա ընդգծեց, որ նման հանդիպումները վերջին շրջանում դարձել են ինքնանպատակ. «Մեղավորն Ալիեւն է: Սերժ Սարգսյանն ասել է, որ ինքը տվել է համաձայնությունը Կազանի փաստաթղթի առնչությամբ: Խնդիրն այն է, որ հայկական կողմը առավելագույն զիջումների պատրաստակամությունը հայտնել է, իսկ Ալիեւի կողմից դա չկա: Ասում ենք, որ պատրաստ ենք զիջել 6,5 շրջան, ինչին ես դեմ եմ, բայց Ադրբեջանը պատրաստ չէ դրան, չի ուզում խաղաղ լուծում տալ հարցին: Ադրբեջանն ասում է՝ «ամեն ինչ տվեք ու գնացեք», ինչը չի աշխատելու»:
Քաղաքագետի բնորոշմամբ՝ Իլհամ Ալիեւն այս հարցում գնալով ոչ ադեկվատ է դառնում. «Խոսում է բաներ, որոնք եթե առաջ կարող էին վերագրվել ներքին լսարանին, ապա հիմա այդպես չէ: Խոսքը Էրիվանն ու Զանգեզուրն «ազատագրելու» մասին է, ինչը պատերազմի եւ Հայաստանը ոչնչացնելու կոչ է»:
Լուիզա ՍՈՒՔԻԱՍՅԱՆ
