«Հույս ունեմ եւ հավատում եմ, որ փաստաթուղթն ի վերջո ստորագրվելու է: Երկրորդ անգամ Եվրոպային «գցելը» մեզ չեն ների: Սերժ Սարգսյան էլ է դա հասկանում»,-«Փաստարկ» մամուլի ակումբում այսօր անդրադառնալով ՀՀ նախագահ Սերժ Սարգսյանի՝ երեկ «բազեականների» հետ հանդիպմանն արված հայտարարությանը, թե աշնանը Հայաստանը ԵՄ-ի հետ ստորագրելու է համապարփակ և ընդլայնված գործընկերության համաձայնագիրը, ասաց քաղաքագետ Արա Պապյանը:
Նա ընդգծեց՝ չնայած դրան, ինչպես ասում են, աչքը տեսածից է վախենում. «2013-ին էլ էին ասում, թե հնարավոր չէ, որ այն չստորագրվի: Գալուստ Սահակյանն այդպես ասաց, բայց ժամեր հետո իմացանք, որ Սերժ Սարգսյանը հրաժարվել է եվրաասոցացումից եւ պարտավորվել ԵՏՄ մտնել»:
Քաղաքագետի խոսքով՝ այս անգամ համաձայնագրի ստորագրման հավանականությունն ավելի մեծ է. «Փաստաթուղթը բավականին մշակված է: Այն ավելի թույլ եւ փոքր կլինի, բայց «օդանցքի» հնարավորություն կտա Հայաստանին»:
Արա Պապյանը նաեւ նկատեց՝ նախագահը նման բան է ասել, բայց նախկինում էլ նա խոստումներ է տվել ու չի կատարել. «Նա շատ ավելի լուրջ բաներ էլ է խոստացել՝ Ստեփանակերտի օդակայանի բացում, Զանգեզուրի երկաթգիծ, նոր ատոմակայան…Միաժամանակ, նա բոլորի նախագահն է, ոչ թե «բազեների», պետք է բոլոր լրատվամիջոցների համար նման հանդիպում կազմակերպի»:
Լուիզա ՍՈՒՔԻԱՍՅԱՆ
