«Մի ամբողջ մարզի` Արմավիրի մարզպետը դուրս է եկել իմ դեմ»

Արտաշար գյուղի միջնակարգ դպրոցի նախկին տնօրեն Հասմիկ Սրապիոնյանը վստահեցնում է, որ Աշոտ Ղահրամանյանը ցանկանում է դպրոցի տնօրենի պաշտոնում «անցկացնել» իր հովանավորյալինԱրմավիրի մարզի Արտաշար գյուղի միջնակարգ դպրոցի տնօրենի թափուր տեղի համար հայտարարվող մրցույթը միտումնավոր հետաձգվում է:«Առավոտի» հետ զրույցում դպրոցի նախկին տնօրեն Հասմիկ Սրապիոնյանը, որը 7 տարի պաշտոնավարել է, նշեց, որ երեկ` օգոստոսի 28-ին եւս, տնօրենի թափուր տեղի համար հայտարարված մրցույթը չի կայացել:

Հիշեցնենք, որ այս խնդրին նաեւ անդրադարձել էր «Բարեւ Երեւան» խմբակցության անդամ, կրթության մասնագետ Անահիտ Բախշյանը: Նա մասնավորապես այսպիսի բովանդակությամբ հայտարարություն էր տարածել. «ՀՀ վարչապետի ուշադրությունն եմ  հրավիրում երկրում տարածված այս խնդրի վրա: Արմավիրի մարզի Արտաշար գյուղի միջնակարգ դպրոցի տնօրեն Հասմիկ Սրապիոնյանի հետ մարզպետի կնքած պայմանագրի ժամկետը լրացել է 2016թ. նոյեմբերի 15-ին: Տնօրենի ընտրության կարգի համաձայն՝ դպրոցի կառավարման խորհուրդը եռամսյա ժամկետում պետք է կազմակերպի եւ անցկացնի տնօրենի պաշտոնի թափուր տեղի համար մրցույթը: Ըստ դպրոցի կառավարման խորհրդի որոշման՝ 2017-ի հունվարի 20-ին նշանակվել է մրցույթի օր: Նկատենք, որ դպրոցի կառավարման խորհրդում մարզպետն ունի երկու ներկայացուցիչ՝ Արմավիրի մարզի զորահավաքային նախապատրաստական բաժնի պետ Աշոտ Հակոբյանն ու մարզպետարանի աուդիտի բաժնի աշխատակից Վիգեն Խաչատրյանը: Հավելեմ, որ խորհրդի նախագահը հենց ԱԻՆ աշխատակիցն է, կասկածից վեր է՝ մարզպետի ցուցումով:

Հունվարի 20-ին մրցույթին ներկայացել են դպրոցի կառավարման խորհրդի 5 անդամներ, չեն ներկայացել խորհրդի նախագահ Աշոտ Հակոբյանը, Վիգեն Խաչատրյանն ու ԿԳՆ-ի Հակոբ Հովասափյանը: Ըստ վերոնշյալ կարգի՝ մրցույթն իրավազոր է համարվում, եթե մասնակցում են խորհրդի 6 անդամներ: ԿԳՆ ներկայացուցիչն արձանագրել է մրցույթի ոչ իրավազոր լինելն ու հետաձգել է 5 աշխատանքային օրով: Հունվարի 27-ին կրկնվել է նույն պատմությունը. կրկին չի ներկայացել դպրոցի կառավարման խորհրդի նախագահ Աշոտ Հակոբյանը, ու քանի որ մեկ թեկնածու է եղել, գործող կարգի համաձայն՝ հայտարարվելու է նոր մրցույթ»:Տիկին Բախշյանի նաեւ

Հասմիկ Սրապիոնյանի հավաստմամբ` սա մարզպետների կողմից կիրառվող շատ հայտնի  մանիպուլյացիա է, երբ տարբեր պատճառներով, նաեւ կոռուպցիոն, նրանք ուզում են ազատվել գործող տնօրենից՝ հայտարարելով, ինչպես պարոն Ղահրամանյանն է ասել, տնօրենը չի համապատասխանում այդ պաշտոնին:Հասմիկ Սրապիոնյանը մեզ հետ զրույցում խոսեց մի շարք խախտումների մասին, օրինակ` այն, որ ըստ կանոնակարգի` մրցույթ պետք է հայտարարվեր եռամսյա ժամկետում, մինչդեռ հունվարի 20-ից հետո մրցույթ է հայտարարվել միայն օգոստոսի 20-ին: Տիկին Սրապիոնյանը նաեւ տեղեկացրեց, որ եթե մյուս դպրոցներում նախկին տնօրենն է նշանակվել պաշտոնակատար, իրենց դպրոցում ինքը չէ տնօրենի ժամանակավոր պաշտոնակատար. «Ինձ հանեցին, ես սովորական մանկավարժ եմ աշխատել:

Հետո փոխտնօրենին նշանակեցին ժամանակավոր պաշտոնակատար, հետո պատմության ուսուցչին, ի վերջո, երկուսին էլ հանեցին, Արմավիրից ֆիզկուլտուրայի ուսուցչի` Էդվարդ Սարգսյանին բերեցին պաշտոնակատար, որին էլ ուզում են անցկացնել: Ինքն էլ հայտարարում է, թե վայելում է մարզպետի հովանավորությունը»: Տիկին Սրապիոնյանն ասաց, որ երբ հանդիպել է մարզպետարանի կրթության վարչության պետին` Գայանե Սայադյանին, նա բացահայտ ասել է, որ մարզպետը չի ցանկանում իր հետ աշխատել: Ակնարկել են, թե «մարդ կդնենք քո դեմ, ինքն էլ կանցնի»:Անդրադառնալով երեկ նշանակված մրցույթին` տիկին Սրապիոնյանն ասաց, որ դրա ժամանակ եւս, ինչպես նախորդների դեպքում, քվորում չի ապահովվել. «Մարզպետարանի երեք ներկայացուցիչներն էլ եկան, բայց տեսա, որ խորհրդի նախագահը փոխված է, զարմացա` պատճառաբանեցին, թե նախկին նախագահը գնացել է Սանկտ Պետերբուրգ, մարզպետն ուրիշին է նշանակել: Հետո տաս րոպե անց այդ երեք ներկայացուցիչներն ասացին`պարզ է, որ քվորում չի ապահովվի, հինգ րոպե նստենք, գնանք. պարզ չէ՞, որ խորհրդի մյուս անդամները չեն գա: Հարցրի` կարո՞ղ է տեղյակ չեք պահել, ասացին, թե մեկ ամիս առաջ տեղեկացրել են: Ես էլ զարմացա` գուցե մոռացե՞լ էին: Ակնհայտ էր` իրենց ձեռք չի տալիս, որ մրցույթ անցկացնեն: Ավելին, ըստ կանոնակարգի` պետք է մրցույթ անցկացվի հինգ օր հետո, բայց ինձ ասացին, որ մեկ ամիս անց է լինելու:

Սա էլ է խախտում»:Տիկին Սրապիոնյանից հետաքրքրվեցինք` ինչո՞վ է նրանց ձեռնտու, որ մրցույթները հետաձգվեն, նախկին տնօրենը պատասխանեց. «Իրենք համոզված են, որ խորհրդի անդամներից հինգն էլ ինձ են ընտրելու, դրա համար ձգձգում են: Խորհրդի անդամներն էլ են ասում, որ մարզպետը հայտարարել է, թե կբռնի, խորհրդի հինգ անդամներին էլ կփոխի: Ես էլ ասացի, թե մարզպետը նման իրավունք չունի, ամեն օղակ ինքն է դա որոշում»:Մեր այն հարցին` որո՞նք են լինելու Ձեր հետագա քայլերը, տիկին Սրապիոնյանը պատասխանեց. «Ես հասկանում եմ`մի ամբողջ մարզի` Արմավիրի մարզպետը դուրս է եկել իմ դեմ, իմ հույսը միայն լրատվամիջոցերն են. ես ի՞նչ կարող եմ անել: Այսպես մրցույթը ձգձգելով` մարզպետն ուզում է  խորհրդում այնպիսի մարդիկ դնել, որ իրենց թեկնածուին  անցկացնեն: Հետո էլ կասի, թե՝ բա որ իր գյուղացիներն իրեն չընտրեցին, ես մեղավո՞ր եմ»:

ՏԱԹԵՎ ՀԱՐՈՒԹՅՈՒՆՅԱՆ

«Առավոտ»

29.08.2017