«Վանաձոր-Քիմպրոմ»-ի ջերմաէլեկտրակայանի (ՋԷԿ) նախկին աշխատակիցները շարունակում են պահանջել իրենց չվճարված աշխատավարձերը: Ընկերությունը դատարանի որոշմամբ 153 աշխատակցի պարտք է շուրջ 130 միլիոն դրամ:
Հունիս-հուլիս ամիսներին՝ մոտ մեկ ամիս, քիմպրոմցիները շուրջօրյա հերթապահություն էին իրականացնում գործարանի բակում, նրանք փակել էին գործարանի մուտքը:
Այդ ընթացքում բողոքի ակցիայի մասնակիցներին էր հանդիպել «Վանաձոր-Քիմպրոմ»-ի սնանկության գործով կառավարիչ Կարեն Ասատրյանը: Վերջինս խոստացել էր մինչեւ հուլիսի 21-ը աշխատավարձի խնդիրը լուծել:
«Եկավ մեր առաջ կանգնեց տղամարդու խոսք տվեց, համոզիչ ու հուսադրող բառեր ասեց: Մենք էլ հավատացինք, որ իսկապես ինչ-որ քայլեր են ձեռնարկում մեր հարցի լուծման համար: Հավատացինք, բայց հիմա, զգում ենք, որ էլի խաբված ենք, էլի չտվեցին աշխատավարձերը: Բոլորս էլ կարիքի մեջ ենք: Դա էլ մեր հալալ քրտինքով աշխատած փողերն են, ո՞նց թողնենք»,- ասում է ընկերության նախկին աշխատակից Զորիկ Բաբաջանյանը:
Հանդիպումից հետո, սակայն որեւէ մեկի աշխատավարձի պարտքը չի մարվել: Աշխատակիցները կրկին սպասում են որեւէ պատասխանի:
«Եկավ, ասաց ժողովուրդ ջան, դուք մի հատ ցուցակ կազմեք, ներկայացրեք, մի քանի օրվա ընթացքում ես խոստանում եմ ձեր հարցը կարգավորել: Վերեւներում խոսացել եմ, հարցը լուծված է: Մենք էլ հավատալով իրեն, անցավ մոտավորապես մի ամիս, զանգում ենք ինքը չկա, անհասանելի է համարը: Վերջապես մեր զանգերին պատասխանեց, ասաց հինգշաբթի օրվա կառավարության նիստում պետք է քննարկվեր հարցը: Ասաց, ինձ թվում է, որ հարցը լուծում կստանա, ես ձեզ տեղյակ կպահեմ: Ու մինչեւ հիմա զանգում ենք, էլի անհասանելի»,- մեզ հետ զրույցում պատմեց «Քիմպրոմ»-ի նախկին աշխատակից Աշոտը:
6 տարի շարունակ աշխատավարձի սպասող նախկին քիմպրոմցիներն ասում են, որ այլեւս ոչ ոքի չեն հավատում. «Մեր համբերության բաժակն արդեն լցվել է: Ցավալին այն է, որ գոնե ինքը զանգեր ասեր, ժողովուրդ ջան մի 10 օր էլ համբերեք, կլինի աշխատավարձը: Մենք սուսուփուս էլի կհամբերեինք: Բայց սա արհամարհանք է, արդեն որերորդ անգամն է խաբում է մեզ»,- սրտնեղած ասում են աշխատակիցները:
Նրանք խոստանում են, եթե առաջիկայում խնդիրը լուծում չստացավ, այլ քայլերի են դիմելու:
Իրավիճակի վերաբերյալ մենք եւս փորձեցինք կապ հաստատել Կարեն Ասատրյանի հետ, սակայն վերջինիս հեռախոսահամարն անհասանելի էր:
ՏԱԹԵՎԻԿ ՂԱԶԱՐՅԱՆ
«Առավոտ»
26.08.2017
