Առաջարկում եմ մի համեղ, օգտակար եւ գեղեցիկ ուտեստ, որը կարող է լավ տարբերակ լինել` ընտանեկան կիրակնօրյա ընթրիքի համար:
Անհրաժեշտ մթերքները
1 միջին չափսի հավ
1 խոշոր կամ 2 միջին դդմիկ կամ ցուկինի
2 թարմ տաքդեղ` կանաչ, կարմիր կամ դեղին
2 գազար
4-6 ճաշի գդալ բուսայուղ
1 սուրճի բաժակ սպիտակ գինի
3-4 պճեղ սխտոր
Ձեր նախընտրած համեմուքները` հավը համեմելու համար (կարմիր եւ սեւ պղպեղ, համեմի աղացած սերմ, քարրի, խմելի սունելի եւ այլն` ինչ հարմար է ձեր քիմքին)
Չորացրած սուր հոտով կանչիներ (ուրց, հազրեվարդ, ծիթրոն կամ «պրովանսյան խոտեր»)- 1 թեյի գդալ` բանջարեղենի համար
Աղ` ըստ ճաշակի
Պատրաստման եղանակը
Հավը լավ լվացեք, մասնատեք կտորների:Չորացրեք թղթե սրբիչով, դրեք ամանի մեջ: Վրան քերեք մաքրած եւ լվացած սխտորի պճեղները, ավելացրեք 3 ճաշի գդալ բուսական յուղ, ձեր նախընտրած համեմուքները, մի լավ խառնեք, որ բոլոր համեմուքներից հավի բոլոր կտորներին հասնի: Ապա դրեք մի կողմ: Այս գործողությունը կարող եք անել նախորդ օրը, այդ դեպքում հավը պետք է պահել սառնարանում` փակ ամանի մեջ: Իսկ եթե նույն օրն եք պատրաստում, ապա առնվազն 30 րոպե թողեք որ համեմվի` սենյակային ջերմաստիճանում, եթե դրանից ավելի պետք է մնա` դրեք սառնարան:
Դդմիկն ու պղպեղը լավ լվացեք, գազարը մաքրեք կեղեւից եւ նույնպես լավ լվացեք: Բոլոր բանջարեղենները բարակ շերտերով կտրատեք:
2-3 ճաշի գդալ բուսական յուղով թեթեւակի տապակեք (հարկ եղած դեպքում կարող եք բուսայուղն ավելացնել): Տապակած բանջարեղենը դրեք ափսեի մեջ, վրան աղ, պղպեղ եւ չորացրած կանաչի ավելացրեք:
Նույն թավայի մեջ տապակեք նաեւ համեմված հավի կտորները` բոլոր կողմերից: Երբ հավի կտորները լավ տապակված կլինեն` վրան շարեք տապակած բանջարեղենը, ավելացրեք մեկ սուրճի բաժակ սպիտակ գինին, թավայի բերանը փակեք կափարիչով, կրակը ցածրացրեք` որքան հնարավոր է, եւ թողեք, որ հավն ու բանջարեղենն իրար հետ շոգեխաշվեն մոտ 20-25 րոպե: Ընթացքում ուշադիր եղեք, որ գինին ամբողջությամբ չգոլորշիանա, այլապես մի փոքր էլ ավելացրեք:
Երբ զգաք, որ հավն ամբողջապես եփվել է (դանակը կամ պատառաքաղը շատ հեշտությամբ մտնում-դուրս է գալիս ամենահաստ կտորի մեջ), կարող եք անջատել: Անջատելուց անմիջապես հետո մի կտոր կարագ ավելացրեք, որպեսզի ստացված թանձրահյութը էլ ավելի համեղ լինի: Ավելացրեք նաեւ մանր կտրատած թարմ կանաչի` համեմ, մաղադանոս, սամիթ` ինչ կկամենաք: Մատուցեք տաք-տաք:
Բարի ախորժակ:
Պատրաստեց Մելանյա ԲԱՐՍԵՂՅԱՆԸ
«Առավոտ»
26.08.2017
