«Թուրքմենստան-ՀՀ գործակցությունը կարեւոր փուլում է՝ Ադրբեջան-Թուրքմենստան լրջագույն հակասությունների համատեքստում»,-«Պոստ Սկրիպտում» մամուլի ակումբում այսօր լրագրողների հետ հանդիպմանն անդրադառնալով ՀՀ եւ Թուրքմենստանի նախագահների՝ օրերս կայացած հանդիպմանը եւ բանակցություններին, ասաց թուրքագետ Մուշեղ Խուդավերդյանը: Նա մանրամասնեց. «ԽՍՀՄ փլուզումից ի վեր Ադրբեջանն ու Թուրքմենստանը չեն կարողանում մի շարք հարցերի շուրջ համաձայնության գալ: Կասպից ծովի նավթահանքերի շահագործման շուրջ վեճի մասին է խոսքը: Նավթահանքերը մոտ են երկու երկրներին էլ, բայց ավելի շատ՝ Թուրքմենստանին: Չի բացառվում, որ Թուրքմենստանը ռազմական գործողություններ կսկսի Ադրբեջանի դեմ»:
Փորձագետը նկատեց՝ Թուրքմենստանը եւ Հայաստանն Ադրբեջանի հետ լրջագույն խնդիրներ ունեն, իսկ սա խոսում է այն մասին, որ երկու երկրներն ընդհանուր շահ ունեն՝ ընդդեմ Ադրբեջանի ագրեսիվ քաղաքականության. «Ադրբեջանը եւ Թուրքմենստանը նավթ արդյունահանող երկրներ են: Թուրքմենստանը նավթային եւ գազային պաշարներով մի քանի անգամ գերազանցում է Ադրբեջանին: Եթե Թուրքմենստանը գնի իր նավթային եկամուտներին համապատասխան զինտեխնիկա, մի քանի անգամ կգերազանցի Ադրբեջանի գնումներին: Հնարավոր ռազմական գործողությունների դեպքում, եթե երրորդ կողմը չմիջամտի, շատ ավելի հավանական է Ադրբեջանի ռազմական պարտությունը, քան Թուրքմենստանի»:
Մուշեղ Խուդավերդյանը միաժամանակ ընդգծեց, որ Թուրքմենստանն ու Ադրբեջանը նաեւ համագործակցային դաշտ ունեն, եւ դա է պատճառը, որ Թուրքմենստանն Արցախյան հակամարտության հարցում չի փորձում
բացահայտ հակաադրբեջանական հայտարարություններ անել. «Սակայն, հակամարտության գոտում հնարավոր պատերազմի դեպքում Թուրքմենստանը կօգտվի առիթից եւ կձգտի նավթահանքերի խնդիրն իր օգտին լուծել»:
Լուիզա ՍՈՒՔԻԱՍՅԱՆ
