Շենգավիթ վարչական շրջանի ընդհանուր իրավասության դատարանում այսօր «Ժիրայր Սեֆիլյանի եւ մյուսների» գործով հերթական դատական նիստն է: Հիշեցնենք, որ «Հիմնադիր խորհրդարան»-ի առաջնորդ, Շուշիի առանձնակի գումարտակի հրամանատար, ազատամարտիկ Ժիրայր Սեֆիլյանը մեղադրվում է մի խումբ անձանց հետ, զենքի գործադրմամբ, շենքեր, շինություններ, հաղորդակցության և կապի միջոցներ զավթելու փորձի մեջ, այդ թվում՝ Երևանի հեռուստաաշտարակը, ինչի ընթացքում էլ վերջինս կազմակերպել է մի խումբ անձանց կողմից ապօրինի կերպով զենք և ռազմամթերք ձեռք բերելը, փոխադրելը և տարբեր վայրերում դրանք ապօրինի կերպով պահելը:
Նիստի մեկնարկին որպես Ժիրայր Սեֆիլյանի եւ Ներսես Պողոսյանի հանրային պաշտպան ներգրավված Մարինե Թովմասյանը դատավորին ասաց, որ օրերս տեսակցել է վերջիններիս, եւ նրանք հայտնել են, որ չեն ցանկանում օգտվել իր մասնագիտական ծառայություններից: Սեֆիլյանն առհասարակ հրաժարվել է տեսակցել որեւէ հանրային պաշտպանի: Դատավորը Տաթեւիկ Գրիգորյանը, սակայն, պարզաբանեց, որ ամբաստանյալները սանկցիայի են ենթարկված եւ հեռացված նիստերի դահլիճից, իսկ այդ դեպքում պաշտպանի մասնակցությունը պարտադիր է:
Հիշեցնենք, որ նախորդ նիստերում դատարանի հանդեպ անհարգալից վերաբերմունքի համար ամբաստանյալները որոշակի ժամանակահատվածով հեռացված են նիստերի դահլիճից: Ապա փաստաբան Մարինե Թովմասյանը միջնորդեց ամբաստանյալներին ներկայացնել նիստերի դահլիճ, որպեսզի մասնակից լինեն դատավարությանը: Դատավորը որոշեց միջնորդությունը մերժել:
Լուիզա ՍՈՒՔԻԱՍՅԱՆ
