Երեկ Սոչիում կայացած ՌԴ նախագահ եւ ՀՀ նախագահ Սերժ Սարգսյանի եւ Վլադիմիր Պուտինի հանդիպումը Եվրասիական փորձագիտական ակումբի համակարգող, «Ինտեգրացիա և զարգացում» հետազոտական-վերլուծական կազմակերպության նախագահ Արամ Սաֆարյանը համարում է շատ կարևոր իրադարձություն մեր երկրի համար։ «Երկու երկրների նախագահներն ընդգծեցին հայ-ռուսական ռազմաքաղաքական համագործակցության կարևորությունը, ռազմավարական դաշնակցությունը»,- «Սպուտնիկ-Արմենիա» մամուլի ակումբում իր կարծիքը հայտնեց նա`հավելելով, որ Հայաստանը գտնվում է բարդ տարածաշրջանում, որտեղ կան մեծ ու փոքր կոնֆլիկտներ. «Այստեղ իրավիճակը խաղաղ չէ, բայց իրավիճակը խաղաղ չէ նաև ամբողջ աշխարհում։ Ռուսաստանի և ԱՄՆ-ի հարաբերությունները հարթ չեն, և այս ամենի ֆոնին կարևոր է մեր երկու երկրների միությունը՝ ընդդեմ արտաքին մարտահրավերների»։
Արամ Սաֆարյանը նախագահների հանդիպման ընդհանուր ֆոնը դրական է համարում. «Անհրաժեշտ է պարզապես ընդգծել, որ մեր հարաբերությունները գտնվում են շատ բարձր մակարդակի վրա, և այդ մակարդակը հնարավորություն է տալիս սրտացավորեն քննարկել բոլոր մեծ ու փոքր հարցերը, որոնք տեղ ունեն երկկողմ հարաբերություններում»։
Արամ Սաֆարյանն ուշադրություն է հրավիրում այն փաստին, որ ՌԴ նախագահին դիմելիս ՀՀ նախագահն ասել է`ողջունում եմ երկու սուվերեն պետությունների ղեկավարների հանդիպումը: Բանախոսը պնդում է`Հայաստանը ԵԱՏՄ է մտել հենց իր սուվերենությունը պահպանել-պաշտպանելու համար ու նախագահ Սերժ Սարգսյանի նման դիմելաձեւը պատասխան է համարում ԵԱՏՄ-ին դեմ արտահայտվողներին:
Նելլի ԳՐԻԳՈՐՅԱՆ
