Ավան եւ Նոր Նորք վարչական շրջանների ընդհանուր իրավասության դատարանում այսօր 2016թ. Ոստիկանության ՊՊԾ գունդը գրաված «Սասնա ծռեր» զինված խմբի անդամներից 12-ի գործով դատական նիստում որոշակի ժամանակով նիստերի դահլիճ բերվեց ամբաստանյալներից Պավել Մանուկյանը, որպեսզի դիրքորոշում հայտնի իր պաշտպանների ներգրավման առնչությամբ: Հիշեցնենք, որ Պավել Մանուկյանը դատարանի հանդեպ անհարգալից վերաբերմունքի համար որոշակի ժամանակով հեռացված է նիստերի դահլիճից:
Նա նախ դատավոր Արտուշ Գաբրիելյանից հետաքրքրվեց՝ իր սանկցիան վերացվե՞լ է, որ իրեն բերել են դատարան: Դատավորը պարզաբանեց, որ ոչ: «Բա ինչի՞ եք ինձ բերել»,-դժգոհեց Մանուկյանը: Ինչ վերաբերում է պաշտպաններին, Պավել Մանուկյանն ասաց, որ չի հրաժարվում նրանցից. «Հայաստանի բոլոր քաղբանտարկյալները երազում են իմ պաշտպանների պես պաշտպաններ ունենալ, ես նրանց խիստ եմ սիրում»:
Ապա ամբաստանյալը հավելեց, որ արգելում է իր պաշտպաններին առանց իր ներկայության մասնակցել նիստերի: Դատավորն ու Պավել Մանուկյանը, սակայն լեզու չգտան: Դատավորն ասաց, որ վերջինիս պաշտպանների ներգրավելու հարցը կքննարկեն այն ժամանակ, երբ Մանուկյանի սանկցիայի ժամկետը կլրանա: Պավել Մանուկյանը հաստատեց դա, ապա ոստիկանները նրան ուղեկցեցին:
Լուիզա ՍՈՒՔԻԱՍՅԱՆ
