Ավան եւ Նոր Նորք վարչական շրջանների ընդհանուր իրավասության դատարանում այսօր 2016թ. Ոստիկանության ՊՊԾ գունդը գրաված «Սասնա ծռեր» զինված խմբի անդամներից 12-ի գործով դատական նիստը վերսկսվելուն պես դատավոր Արտուշ Գաբրիելյանը որոշեց մերժել իր դեմ ավելի վաղ ներկայացված ինքնաբացարկի միջնորդությունը:
Ապա տեւական դադարից հետո նիստերի դահլիճ բերվեց ամբաստանյալներից Արայիկ Խանդոյանը՝ «Միայնակ գայլ», որպեսզի դիրքորոշում արտահայտի իր պաշտպանների ներգրավման առնչությամբ: Նրա սանկցիայի ժամկետը լրացավ: Խանդոյանը դատավորին դիմեց «ընկեր Գրիգորյան»-ով, ասաց, որ իր պաշտպան Արա Ղարագյոզյանից չի հրաժարվում, ապա դատավորի ճշտող հարցին այսպես արձագանքեց. «Իմ ազգն է իմ պաշտպանը, ցավդ տանեմ, ինձ պաշտպան պետք չի, հարձակվող է պետք»:
Ապա հերթը հասավ ամբաստանյալ Գագիկ Եղիազարյանի ինքնությունը ճշտելուն: Նա դատավորի հարցին ի պատասխան ասաց, որ նախկինում դատվածություն չի ունեցել. «Դատվածություն չունեմ դեռ, ադրբեջանցիները կդատեն…»:
Լուիզա ՍՈՒՔԻԱՍՅԱՆ
