Ավան եւ Նոր Նորք վարչական շրջանների ընդհանուր իրավասության դատարանում այսօր 2016թ. Ոստիկանության ՊՊԾ գունդը գրաված «Սասնա ծռեր» զինված խմբի անդամներից 12-ի գործով նիստից առաջ հերթական միջադեպը տեղի ունեցավ փաստաբանի եւ կարգադրիչի միջեւ: Ամբաստանյալների պաշտպաններից Հայկ Ալումյանը զննություն անցնելու ժամանակ կարգադրիչին խնդրեց ներկայացնել համապատասխան որոշում առ այն, թե որոնք են արգելված իրերը, որոնք չի կարելի մտցնել դատարան:
Դատական կարգադրիչն էլ ասաց. «Եթե ձեզ մոտ կա սուր՝ կտրող-ծակող գործիք, խնդրում եմ՝ ազատվեք դրանից, կամ թողեք պահարանում: Կարգադրիչն է պատասխանատու նիստերի դահլիճում ներկաների անվտանգության համար»:
Հայկ Ալումյանն էլ պնդեց, որ դա փաստաբանների հանդեպ կամայական մոտեցում է: Ի վերջո, փաստաբանն առանց զննության՝ նիստերի դահլիճ չմտավ եւ համապատասխան գրություն թողեց դատավորին: «Անգամ ջրի շիշն եք արգելում ներս տանել, ասում եք, թե արգելված իր է, որը կարող են շպրտել մեկի վրա: Բայց նույն կերպ, կոշիկն էլ կարող է արգելվել»,-հեգնեց փաստաբանը:
Լուիզա ՍՈՒՔԻԱՍՅԱՆ
