Ծտապաշար, եզան ճակտիկ, հովվամաղախ կամ հովվապարկ. այս անուններով է հայտնի օգտակարությամբ աչքի ընկնող այս բույսը:Այն օժտված է թույլ արտահայտված հիպոտենզիվ հատկություններով, ուժեղացնում է արգանդի մկանունքի տոնուսը, նեղացնում է պերիֆերիկ անոթները։ Նշանակում են արգանդային եւ թութքային արյունահոսությունների ժամանակ։
Որպես արյունականգ միջոց
ա) 2 ճաշի գդալ խոտին ավելացնել 1 բաժակ եռացրած ջուր, տաքացնել ջրաբաղնիքի վրա 15 րոպե, սառեցնել սենյակային ջերմաստիճանում 45 րոպե, քամել։ Ստացված ջրաթուրմի ծավալը տաք ջրով հասցնել սկզբնականին։ Ընդունել 1 ճաշի գդալ՝ օրը 4-5 անգամ՝ ուտելուց հետո։
բ) 10 գրամ խոտին ավելացնել 1 բաժակ եռման ջուր, թրմել, սառելուց հետո քամել։ Ընդունել 1 ճաշի գդալ՝ օրը 4-5 անգամ։
Լեղամուղ միջոց
40-50 գրամ խոտին ավելացնել 1 լիտր եռման ջուր, թրմել 30 րոպե, քամել։ Ընդունել 0,5 բաժակից՝ ուտելուց 1 ժամ առաջ։
Երիկամային բորբոքային հիվանդություններ
40 գ խոտին ավելացնել 1 բաժակ եռման ջուր, թրմել 30 րոպե, քամել։ Ընդունել 1 բաժակ՝ օրը 3 անգամ։
Անմիզապահության ժամանակ
3 ճաշի գդալ խոտին ավելացնել 2 բաժակ եռման ջուր, թրմել թերմոսում 3-4 ժամ, քամել։ Ընդունել 0,5 բաժակից՝ օրը 4 անգամ՝ ուտելուց առաջ։Դաշտանադադարի (կլիմաքսի) դեպքում 1 ճաշի գդալ խոտը թրմել 2 ժամ 1 բաժակ եռման ջրով, քամել։ Ընդունել 1 ճաշի գդալ՝ օրը 4 անգամ՝ 30 րոպե ուտելուց առաջ։
Պատրաստեց ԱՆՈՒՇ ՄԱԹԵՎՈՍՅԱՆԸ
«Առավոտ»
22.07.2017
