«Մուղամի, կլկլոցների կրիչների վաճառքի սահմանափակում չկա»,-այսօր այս մասին «Մեդիա կենտրոնում» ասաց Երեւանի ավագանու «Ելք» խմբակցության անդամ Արայիկ Հարությունյանն՝ անդրադառնալով «Ելքի»՝ ռաբիս երաժշտության արգելքի մասին առաջարկին:
Հարությունյանն ասաց, որ այն փաստաթուղթը, որը հրապարակել էր, վերաբերում էր բացառապես Վերնիսաժում հնչող ռաբիս երաժշտությանը: Ըստ Հարությունյանի, Վերնիսաժը քաղաքապետարանի տնօրինության տակ գտնվող օբյեկտ է եւ զբոսաշրջիկներն առաջինը առնչվում են հայ մշակույթի, արվեստի ու արհեստի հետ հենց Վերնիսաժում, ուստի քաղաքապետարանը կարող է թելադրել, թե ինչպիսի միջավայր կարող է լինել Վերնիսաժում:
Հարությունյանը նաեւ վստահեցրեց, որ «Ելքն» առաջարկելու է ավագանիում քննարկել մեկ միասնական տրանսպորտային համակարգում միասնական տոմսի գաղափարը:
«Ելք» խմբակցության անդամ Դավիթ Խաժակյանն էլ անդրադառնալով փողոցների անվանափոխության խմբակցության առաջարկին, ասաց, որ առաջիկայում կքննարկեն նաեւ ԱԺ ՀՀԿ պատգամավոր Էդուարդ Շարմազանովի՝ Ֆրունզեի անվան փողոցն էլ անվանափոխելու առաջարկին:
Հիշեցնենք, որ «Ելքը» առաջարկում է Միկոյան, Կասյան եւ Լենինգրադյան փողոցներն անվանափոխել. Այս առաջարկությունը բուռն քննադատության արժանացավ: Խաժակյանն անդրադառնալով քննադատություններին, նկատեց՝ «Եթե մենք արժեւորում ենք պետականությունը, ապա մենք ունենք այնպիսի հանրային կառավարում, որտեղ ամեն ինչ համապատասխանում է պետականությունն արժեւորող ժողովրդին»:
Ավագանու անդամի խոսքերով՝ հանրային տրանսպորտի ոլորտում էլ «Ելքն» առաջարկել է ավտոբուսների համար ունենալ առանձնացված երթեւեկելի գծեր, եւ այժմ միջազգային խորհրդատու կազմակերպությունը քննարկում է, թե՝ որ փողոցներն ունեն այդ հնարավորությունը: Ըստ Խաժակյանի, կազմակերպությունն արդեն գտել է նման փողոցներ:
Ավագանու անդամներն ասացին, որ «Ելքի» ծրագրային դրույթներից՝ Մետրոպոլիտենի Աջափնյակ կայանի կառուցման հարցն ուժի մեջ է: «Ելքի» անդամները պարզել են, որ Աջափնյակի թունելները պատրաստ են. «Սա այն հարցն է, որ, ցավոք, մենք կարող ենք միայն լոբբինգ անել: Ուշ, թե՝ շուտ, այս հարցը լինելու է հասարակական քննարկման առարկա»:
Ավագանու «Երկիր Ծիրանիի» հետ համագործակցության հնարավորությանը վերաբերող հարցի շուրջ, Արայիկ Հարությունյանն ասաց, այդ հնարավորությունը գնալով ավելի է նվազում, հաշվի առնելով «Երկիր Ծիրանիի» ղեկավար Զարուհի Փոստանջյանի հայտարարությունները:
Նելլի ԲԱԲԱՅԱՆ
