Էրեբունի եւ Նուբարաշեն վարչական շրջանների ընդհանուր իրավասության դատարանում այսօր «Սարի թաղի գործով» կալանավորվածներից Սարգիս Գրիգորյանի հերթական նիստն էր, որի ընթացքում հարցաքննվել է երկու վկա ոստիկան: Հիշեցնենք, որ հուլիսի 19-ին Սարի թաղում տեղի ունեցած միջադեպի հետեւանքով ոստիկաններ էին տուժել, նրանց եւ քաղաքացիների միջեւ բախում էր տեղի ունեցել այն բանից հետո, երբ սարիթաղցիները դուրս էին եկել փողոց՝ բողոքելու: Այդ օրերին գրավվել էր ՊՊԾ գունդը, որի տարածքը շրջափակելու համար Սարի թաղում դադարեցվել էր գազի, ջրի եւ էլեկտրաէներգիայի մատակարարումը: Այս գործով կալանավորված է 10 քաղաքացի:
Սարգիս Գրիգորյանի շահերի պաշտպան, փաստաբան Լիպարիտ Սիմոնյանն Aravot.am-ի հետ զրույցում տեղեկացրեց, որ այս դեպքում էլ վկա ոստիկանները նույն՝ անորոշ ցուցմունքներն են տվել. «Ասացին, որ որեւէ մեկի գործողությունը հստակ չեն կարող նկարագրել, որ քաղաքացիները փողոց էին դուրս եկել իրենց կենցաղային հարցերով, սակայն, չգիտես ինչպես, քաշքշուկ է սկսվել, քարեր են նետել: Իսկ թե կոնկրետ ով ինչ գործողություն է արել, չեն կարողանում ասել, ամբաստանյալներից ոչ մեկին էլ չեն ճանաչում»:
Փաստաբանը նշեց, որ իր ամբաստանյալ Սարգիս Գրիգորյանն իրեն մեղավոր չի ճանաչում. «Մեղադրանքի էությունն էլ է անհասկանալի, որովհետեւ որեւէ մեկի գործողությունը հստակեցված չէ»:
Լուիզա ՍՈՒՔԻԱՍՅԱՆ
