Երեքշաբթի երեկոյեան, Կլենտէյլի քաղաքապետական խորհուրդի նիստին ընթացքին քանի մը խօսք առնողներու բերանէն հնչեց այսպիսի վճռական յայտարարութիւն. «Ոտք չե՛նք կոխեր «Ամերիքանա», մինչեւ որ այդ հաստատութեան տնօրէնութիւնը չփոխէ իր ուրացման վարքագիծը եւ արտօնէ «Ուրացման Ճարտարապետները» շարժապատկերը ծանուցող պաստառները տեղադրել իր հրապարակին վրայ»:
Որեւէ ժամանակ այցելեցէք «Ամերիքանա» եւ պիտի նկատէք բազմաթիւ հայերու ներկայութիւնը այնտեղ: Ժամանցի եւ առեւտուրի այս կեդրոնը, որուն ստեղծման մէջ Կլենտէյլի հայութիւնը ունեցած է իր կարեւոր ներդրումը, իր կենսունակութիւնը կը պարտի նոյն ա՛յդ հայերուն, որոնք կեանք եւ աշխուժութիւն կը պարգեւեն ամբողջ համալիրին:
Իսկ «Ամերիքանա»ն, որուն սեփականատէրերն ու տնօրինութիւնը, զուտ մարդկային նկատառումներով փոխանակ զգայնութի՛ւն ցոյց տալու մարդկութեան դէմ գործուած ոճիրի զոհերու ժառանգորդներուն հանդէպ, անհասկնալի ու անհեթեթ որոշում մը առին՝ վիրաւորելու իրենց հազարաւոր յաճախորդներն ու այցելուները:
Այս բացարձակ անարգանքը մեր համայնքին ու մեր պատմութեան հանդէպ չենք կրնար անհետեւանք ձգել: Այս պարագային, համոզուած ենք, որ հայկական համայնքին, կլենտէյլահայութեա՛ն հակազդեցութիւնը՝ իրեն ու իր ամբողջ ազգին ուղղուած անարգանքին, պիտի ըլլայ բո՛ւռն ու հզօր:
Նյութի մանրամասները կարդացեք «Ասպարեզ»–ի կայքում
