ՀԱԿ անդամ, տնտեսագիտության դոկտոր Զոյա Թադեւոսյանը մեզ հետ զրույցում քննադատեց իշխանություններին՝ «Սասնա ծռերին» հետապնդելու համար: Նրա խոսքերով՝ «Սասնա ծռերի փաստը այն մասին է խոսում, որ մեր երկրում քաղաքական դաշտը ծանր հիվանդ է»:
Մենք ճշտեցինք՝ Դուք խոսեցիք «Սասնա ծռերի» հետ կապված հետապնդումների մասին, բայց ՀԱԿ-ը կոնկրետ չէր ընդունում «Սասնա ծռերի» գործողությունները, չէր արդարացնում զենքի միջոցով իշխանություն վերցնելու փորձը՝ Զոյա Թադեւոսյանը պատասխանեց. «Սասնա ծռերի հետ կապված ՀԱԿ-ի գնահատականը միանգամայն ճիշտ էր՝ այն առումով, որ ներքաղաքական խնդիրները զենքով կամ ռազմական ճանապարհով չի կարելի լուծել: Քաղաքական սուր, լարված իրավիճակի արդյունքը կարող է այնքան աղետալի լիներ, որ դրանից հետո ստացած ձեռքբերումները ամենեւին չլինեն համարժեք ստացված արդյունքներին: Դա քաղաքացիական պատերազմի կարող էր վերածվել: Եվ լավ էր, որ իրենք էլ հասկացան: Կարծում եմ, որ «Սասնա ծռերի» քայլը տարբեր գնահատականների կարող է արժանանալ, բայց, համենայնդեպս, իմ կարծիքով, նրանք այդ ձեւով փորձում էին ժողովրդի մեջ պայքարի ոգի արթնացնել: Այն, որ նրանք հանձնեցին զենքը, դա էր փաստում: Ես չեմ պատկերացնում, որ նրանք կփորձեին ժողովրդի տարբեր հատվածների մեջ բախում առաջացնել, դա հնարավոր չէր»:
Ինչ վերաբերում է հետապնդումներին, ըստ Զոյա Թադեւոսյանի, դա ուրիշ հարց է. «Դատավարությունը, փաստաբանների նկատմամբ հալածանքները, այն իրավիճակը, որ ստեղծվել է հետո, դա տոտալիտար համակարգին համարժեք իրավիճակ է, որը Խորհրդային միության տարիներին գոյություն ուներ: Այսօրվա իշխանությունները ոչնչով չեն տարբերվում Բրեժնեւի ժառանգորդներից, հետեւաբար, այն, ինչ տեղի է ունենում, տեղի է ունենում համարժեք ձեւով, ինչ նրանք ստացել են իրենց կրթական մակարդակում, դաստիարակության մեջ, աշխատանքային գործունեության մեջ»:
Հռիփսիմե ՋԵԲԵՋՅԱՆ
