Մարզպետարանում գաղտնի են պահում, թե իրենց աշխատողներից ովքեր են պետբյուջեից պարգեւատրվել

Օգոստոսի 7-ին գրավոր հարցում ենք արել Տավուշի մարզպետ Հովիկ Աբովյանին, նրան ուղղելով հետեւյալ հարցը. « 2017թ. հուլիսի 13-ին որոշել եք Տավուշի մարզպետարանի աշխատակազմի քաղաքացիական ծառայողներին պարգեւատրել: Մարզպետարանի աշխատակիցներից ովքե՞ր են պարգեւատրվել, յուրաքանչյուրը որքա՞ն գումարով է պարգեւատրվել»:

Ստացվել է Տավուշի մարզպետարանի աշխատակազմի ղեկավար Արման Գեւորգյանի պատասխանը, ուր նշված է. ««Պետական պաշտոններ զբաղեցնող անձանց վարձատրության մասին» ՀՀ օրենքի 22-րդ հոդվածի համաձայն 2017 թվականի 1-ին կիսամյակի կատարողականի գնահատման արդյունքներով ՀՀ Տավուշի մարզպետարանի աշխատակազմի թվով 89 քաղաքացիական ծառայողներ պաշտոնական դրույքաչափի 75 %-ի չափով ստացել են պարգևատրում 15149800 դրամ ընդհանուր գումարով»:

Տավուշի մարզպետարանի ինտերնետային կայքում զետեղված, մարզպետ Հովիկ Աբովյանի վերոհիշյալ որոշման մեջ նշված է՝ մարզպետարանի քաղաքացիական ծառայողներին պարգեւատրել համաձայն կից հավելվածի, սակայն հավելվածը հրապարակված չէ:

Ոսկան ՍԱՐԳՍՅԱՆ