Իրաքյան Քուրդիստանի անկախության հանրաքվեի քարոզարշավին զուգահեռ, Սիրիայի քրդերն են ոտքի կանգնել: Այս մասին այսօր «Պոստ Սկրիպտում» մամուլի ակումբում ասաց թուրք-քրդական հակամարտության հարցերով փորձագետ, թուրքագետ Կարեն Հովհաննիսյանը: Նա նշեց, որ մասնավորապես Հաքքարի նահանգում, որը միշտ բախումների կիզակետում է, օրերս քրդերի զինված ուժերի եւ թուրք զինվորականների միջեւ լուրջ բախումներ են տեղի ունեցել, թուրք զինվորներ են զոհվել, ինչի մասին Թուրքիայի գլխավոր շտաբը լռում էր. «Տեղեկությունը տարածվեց այն բանից հետո, երբ թուրք զինվորների դիակի նկարները տարածեցին քուրդ զինյալները: Ընդհանուր առմամբ, թուրք-քրդական հարաբերությունները խիստ լարված եւ պայթյունավտանգ են՝ կապված Իրաքյան Քուրդիստանի հանրաքվեի հետ: Թուրքիայի քրդաբնակ հատվածները «այո» են ասելու հանրաքվեին, ինչը խիստ անհանգստացնում է Թուրքիային: Կարծում եմ՝ հետագայում Հաքքարին եւս հայտ է ներկայացնելու անկախության հանրաքվեի»:
Չնայած դրան, ըստ փորձագետի, թուրքական Քուրդիստանի ձեւավորումը մոտ ապագայում տեսանելի չէ, եթե, իհարկե, ֆորսմաժորային իրավիճակներ չլինեն:
«Հատկանշական է, որ եթե մինչ օրս Թուրքիայի քրդերի եւ զինվորականների միջև բախումները տեղի էին ունենում ազգային եւ ռազմական հողի վրա, ապա այժմ, Էրդողանի ձեռամբ, դրանք տեղափոխվել են կրոնական դաշտ: Վերջերս քրդերի կրոնական խորհրդի նախագահին Էրդողանը հրապարակավ հանդիմանեց եւ պահանջեց հրաժարականը: Էրդողանը պատճառաբանում է, որ քրդերը կրոնի հողի վրա են դուրս եկել Թուրքիայի դեմ»,-նշեց Կարեն Հովհաննիսյանը:
Լուիզա ՍՈՒՔԻԱՍՅԱՆ
