Այսօր Կենտրոն եւ Նորք Մարաշ վարչական շրջանների ընդհանուր իրավասության դատարանում մեղադրող դատախազը կարդաց մեղադրանքը՝ Նորք-Մարաշի զինված խմբի գործով:
Դատավոր Բեկթաշյանը զինված խմբի անդամներին հարցրեց՝ ձեզ համար մեղադրանքը հասկանալի՞ է, ընդունո՞ւմ եք այն: Գեւորգ Ջնդոյանը, որն ըստ մեղադրանքի գծագրել է Սահմանադրական դատարանի շենքը եւ ծառայություններ է մատուցել խմբին, ասաց. «Հասկանում եմ մեղադրանքի էությունը, բայց իմ հետ դա ինչ կապ ունի՝ դա չեմ հասկանում»: Նա ասաց, որ միակողմանի եւ սուբյեկտիվ է մեղադրանքը. «Այստեղ հանցավոր անձանց չեմ տեսնում, այստեղ բոլորը պատիվ եւ արժանապատվություն ունեցող մարդիկ են: Ուստի մեղադրանքը չեմ ընդունում եւ ինձ մեղավոր չեմ ճանաչում»:
Ուշագրավ է, որ մեղադրական եզրակացությունում ամբաստանյալներից ոմանց ազգանունը, հայրանունը սխալ էր նշված: Գեւորգ Ջնդոյանի ազգանունը նույնպես սխալ էր, ուստի նա ասաց. «Սա միակ բացթողումը չէ մեղադրական եզրակացության մեջ»:
Սխալ էր նաեւ Նելլի Սլավիկի Մինասյանի հայրանունն ու ազգանունը: Նա հայտարարեց, որ իրեն մեղավոր չի ճանաչում. «Մեղադրական եզրակացության մեջ նշված է Նելլի Սամվելի Մկրտչյան, իսկ ես Սլավիկի Մինասյանն եմ: Եթե էդ ինձ է վերաբերվում, ուղղակի ասեմ, որ չէ, մեղավոր չեմ ճանաչում»:
Պատասխանից ծիծաղեց անգամ դատավոր Բեկթաշյանը, իսկ մեղադրող դատախազը փորձեց արդարանալ, որ մեղադրական եզրակացության մեջ այդպես է նշված:
Հռիփսիմե ՋԵԲԵՋՅԱՆ
