Այս պահին քննիչները բանանի ներկրմամբ զբաղվող գործարար Վահրամ Միրաքյանին պատկանող «Տրոպիկա» ընկերությունում քննչական գործողություններ են կատարում: Այս մասին Aravot.am-ին հայտնեց գործարար Միրաքյանը: Հիշեցնենք, որ այսօր գործարարն իր ֆեյսբուքյան էջում նշել էր , որ գիշերը անհայտ անձիք մտել են իրենց ընկերության տարածք եւ ազոտական թթու (կիսլոտա) լցրել սառնարանների կոմպրեսորների վրա:
Մեզ հետ զրույցում գործարարն ասաց, որ մինչ այս որեւէ անձնական սպառնալիք չի ստացել, սակայն կարող է ենթադրել ինչու են արել.
«Արել են նրա համար, որ խոչընդոտեն մեր գործունեությանը, իսկ մեր գործունեությունը բանանի ներկրումն է: Տվել ենք ոստիկանություն, մնացածն իրենք պետք է պարզեն»:
Վահրամ Միրաքյանի խոսքով, իրենց ներկրման ծավալները կազմում են մոտ 40-60 տոննա կամ երկու ֆուռից մինչեւ 4-5 ֆուռ:
Aravot.am-ի հարցին, թե ներկրման ժամանակ որեւէ խոչընդոտների հանդիպե՞լ են մաքսային մարմնում, մաքսազերծումը արհեստական ձգձգելու կամ այլնի հետ կապված, պարոն Միրաքյանն ասաց, որ որեւէ նման բան չի նկատել, ինչ էլ եղել է, եղել են ընթացակարգային, ինչպես բոլոր մյուս գործարարների մոտ:
Թե որքան վնաս է կրել գործարարը, հատկապես, որ այդ սառնարանները, ըստ նրա, բավականին թանկ արժեն, այս պահին հայտնի չէ, քանի որ, Վահրամ Միրաքյանի խոսքով, ոչ մի սարքավորման ձեռք չեն տվել, քանի որ դրանք իրավապահների համար ապացույց են հանդիսանում:
Գործարարն ասաց, որ սառնարաններում առկա բանանի խմբաքանակը, բարեբախտաբար, չի տուժել, քանի որ կոմպրեսորները եվրոպական որակի են, սակայն, ըստ նրա, եթե լինեին թուրքական կամ չինական, ապրանքն ամբողջությամբ կփչանար. «Վնասներն այս պահին գնահատում են, պարզապես նիկելապատ է եղել, այդ պատճառով չեն վառվել: Բայց ձեռք չենք տալիս, որ մաքրենք` տեսնենք ինչն է տուժել, մինչեւ որ փորձագետը գա»:
Գործարարը նաեւ ասաց, որ կոմպրեսորները ճաղավանդակներով ու կողպեքով փակ են եղել, որը սակայն հանցագործները ջարդել են ու ներս մտել:
Հիշեցնենք, որ անցյալ տարի մի գործարարի եւս խոչընդոտել էին բանան ներկրել, սակայն իրավապահ մարմիններն այդպես էլ չկարողացան պարզեն, թե խոչընդոտողն ով է:
Լուսինե ԲՈՒԴԱՂՅԱՆ
Լուսանկարը՝ Վահրամ Միրաքյանի ֆեյսբուքյան էջից
