Այսօր կառավարության նիստին էներգետիկ ենթակառուցվածքների եւ բնական պաշարների նախարար Աշոտ Մանուկյանն ասաց, որ մինչեւ սեպտեմբեր կառավարության հաստատմանը կներկայացվի էներգետիկ զարգացման հայեցակարգը: Ըստ նախարարի՝ հայեցակարգը նախատեսում է մինչեւ 2036թ. Հայաստանում էլեկտրական էներգիայի սակագինը անփոփոխ թողնել:
Կարեն Կարապետյանը նախարարից հետաքրքրվեց. «Մենք 2036 թ. էներգետիկ զարգացման ծրագրին ե՞րբ ենք անդրադառնում»: Ի պատասխան նախարարն ասաց, որ արդեն երեք անգամ հայեցակարգը ներկայացրել են կառավարություն, բայց հետ են ստացել որոշ դիտողություններով: Հիմնականում դիտողություններն ընդունված են իրենց կողմից:
«Այսօր մենք կարծես թե որևէ խնդիր չունենք, բացառությամբ նրա, որ քննարկման փուլում է կայունացման հիմնադրամի ստեղծման հարցը, որը հնարավորություն կտա պահպանել սակագներն այն մակարդակի վրա, որը կա: Դա ամբիցիոզ ծրագիր է՝ էլեկտրաէներգիայի սակագները մինչև 2036 թ. պահպանել: Դրա համար փնտրում ենք միջոցներ, որ կայունացման հիմնադրամ ստեղծենք, ինչը հույս կտա, որ առաջիկա տարիներին սակագների վրա գոնե արտաքին ազդեցությունը կչեզոքացնենք»,- ասաց Աշոտ Մանուկյանը:
Նելլի ԲԱԲԱՅԱՆ
