Ժիրայր Դադասյան. «Եղել է` մեկ լամպով ենք ներկայացում խաղացել» (Տեսանյութ)

Օգոստոսի 9-ին «Հայացք» մամուլի ակումբում Երևանի մնջախաղի պետական թատրոնի գեղարվեստական ղեկավար Ժիրայր Դադասյանը եւ թատրոնի տնօրեն Արամ Խոջոյանը խոսեցին թատրոնի առաջիկա անելիքներից, թատրոնի նոր շենքի ճարտարապետաշինարարական նախագծի աշխատանքների մեկնարկից:

Ժիրայր Դադասյանը նշեց, որ մշակույթի նախարարը փետրվարի 15-ին էր իրենց հանձնել տարածքի «ոսկե բանալին», իսկ սեփականության վկայականը օրերս են ստացել: Ինչ վերաբերում է շինարարությանը, պարոն Դադասյանի խոսքով, այն ենթադրում է մի շարք մրցույթներ, ամենակարեւորն այն է, որ արդեն գործընթացի մեջ են:

«Վստահ ենք, որ դա լինելու է մի շատ գեղեցիկ շենք, նախագիծն անպայման կդնենք հրապարակային քննարկման, որպեսզի բոլորը մասնակից լինեն, քանի որ բոլորի ցանկությունն էր, որ Մնջախաղի թատրոնը տարածք ունենա»,- հայտնեց գեղարվեստական ղեկավարը:

Ժիրայր Դադասյանն ընդգծեց, որ մրցույթը շահած «Տեխնոշին» ընկերությունը առնչվել է մի խնդրի, որը վերաբերում է շենքի ամրությանն ու ամրակայմանը.շենքի առաջին երկու հարկերը դատարկ են, նախկինում տպարան է եղել, երրորդ հարկը պետք է թատրոն դառնա:

Թատրոնի տնօրեն Արամ Խոջոյանը խոսեց «Մշակութային կանգառ» նախագծին նջախաղի թատրոնի ընդգրկվելուց. «Ինտենսիվ աշխատանքներ են գնում թատրոնների կողմից, եղել է, որ մենք ընդամենը մեկ լույսով ենք ներկայացում խաղացել: Սեպտեմբերին երկու այցելություն կա` Վայոց ձորի մարզ: Մշակութային կանգառի շրջանակում այցելել ենք նաեւ Եղվարդ, Աբովյան, Մարալիկ եւ Արթիկ: Իմիջիայլոց մեզ համար ավելի հեշտ է հյուրախաղ ունենալ արտասահմանում, քան Հայաստանի որեւէ մարզում»:

Ժիրայր Դադասյանը շարունակելով նրա խոսքն՝ ասաց. «Որպեսզի որեւէ գյուղում կարողանաս ներկայացում խաղալ, մի երեք անգամ պետք է գնաս ու գաս, համոզես, որ այդ մարդիկ սիրում են թատրոն: Իմիջիայլոց, մարզերում ֆանտաստիկ հանդիսատես կա: Օրինակ, հենց Արթիկում խաղացինք «Գիրք ծաղկանցը»: Խաղացինք մեկ լամպով: Բայց հանդիսատեսն ինչքա~ն տպավորված էր, դուք տեսնեիք, թե ոնց էին քննարկում ներկայացումը»:

Բանախոսները տեղեկացրին, որ աշնանը հրավերներ ունեն «դրսի» փառատոներից: Ինչ վերաբերում է հայաստանյան միջախաղի փառատոնին, Ժիրայր Դադասյանն ուրախությամբ փաստում է, որ արդեն հաջորդ տարվա մասնակցության համար հայտեր են ստանում: «Մնջախաղն էլ մարմնի երաժշտություն է ու թարգմանության կարիք չունի: Օտարերկրացիները կարող են հանգիստ իրենց մշակույթը ներկայացնել Հայաստանում»,- հավելեց նա:

Ժիրայր Դադասյանը կարեւորեց նաեւ թատրոնում ժամանակավրեպ չլինելը, ասաց, որ դեմ է դպրոցներին, պահպանողականությանը. «Ես չեմ ընդունում, որ ասում են`այսինչի ու այնինչի դպրոց»:

Մնջախաղի թատրոնի գեղարվեստական ղեկավարը խոստացավ, որ իրենց նոր շենքում գործելու է ազատ բեմի գաղափարը եւ մեծ տեղ է տրվելու երիտասարդներին, մի բան, որ տիկնիկային թատրոնում անում է Ռուբեն Բաբայանը:

Մանրամասները՝  տեսանյութերում:

Գոհար ՀԱԿՈԲՅԱՆ