Աջափնյակ եւ Դավիթաշեն վարչական շրջանների ընդհանուր իրավասության դատարանում այսօր էքստրասենս Անի Մաջնունյանի սպանության գործով հերթական նիստն էր: Հիշեցնենք, որ նրա սպանության մեջ մեղադրվում է «Յանուս» արտիստական թատրոնի տնօրեն, երիտասարդ ռեժիսոր Մուշեղ Մխիթարյանը:
Անի Մաջնունյանի մայրը՝ տուժողի իրավահաջորդ Լորետա Գուլմիյանը, առողջական խնդիրների պատճառով կրկին չէր եկել:
Ներկայացել էր հանրային պաշտպանի գրասենյակի փաստաբան Մարինե Ֆարմանյանը, որը պետք է ներգրավվի որպես ամբաստանյալ Մխիթարյանի շահերի պաշտպան: Մարինե Ֆարմանյանը նախկինում էլ Մուշեղ Մխիթարյանի պաշտպանն էր, պարզապես վերջինս դատաքննության որոշակի փուլում հրաժարվեց պաշտպան ունենալուց, իսկ նախորդ նիստում էլ համաձայնեց, որպեսզի կրկին Մարինե Ֆարմանյանը ներգրավվի:
Մուշեղ Մխիթարյանին, սակայն, «Նուբարաշեն» ՔԿՀ-ից չէին բերել: Դատավոր Վարդան Աբրահամյանին գրություն էր ուղարկվել առ այն, որ նա առողջական խնդիրների պատճառով ի վիճակի չէ դատական նիստի մասնակցել: «Զննվել է մասնագետի կողմից, ախտորոշվել է սուր ինֆեկցիա»,-ասված է ՔԿՀ-ի գրության մեջ:
Դատավորն այնուհետեւ արձանագրեց՝ քանի որ կողմերի շահերի պաշտպաններն առաջիկայում արձակուրդում են լինելու, մի քանի դատական նիստ կնշանակվի՝ սեպտեմբերի 25-ին, 26-ին, 27-ին եւ հոկտեմբերի 2-ին, նույն ժամին՝ 13:00-ին:
Դատաքննությունն ապացույցների հետազոտման փուլում է:
Լուիզա ՍՈՒՔԻԱՍՅԱՆ
