Aravot.am-ը իր ընթերցողներից հետաքրքրվել է, թե ինչպես են վերաբերվում երկրի ներսում զինված պայքարին:
Հարցման մասնակիցները ունեին պատասխանի 6 հնարավորություն. «Կտրականապես դեմ եմ, դա մեր երկրի անվտանգությանը սպառնացող վտանգ է», «դեմ եմ, հայը հային չպիտի սպանի», «ընդհանրապես դեմ եմ, բայց դեպքեր կան, երբ կողմ եմ», «կողմ եմ, երբ իշխանությունը համը հանում է, բոլորը պետք է զինվեն», «շատ կողմ եմ, ինքս էլ հաճույքով մի քանիսին կխփեի», «ուզում են զինվեն, ուզում են չզինվեն՝ ինձ հետաքրքիր չէ»:
Եվ այսպես հարցվածների 7 տոկոսը պատասխանել է, որ իրեն հետաքրքիր չէ, 8 տոկոսը պատասխանել է, որ շատ կողմ է զինված պայքարին: Հարցման մասնակիցների 13 տոկոսը ընդհանրապես դեմ է, բայց լինում են դեպքեր, երբ կողմ է: 17 տոկոսը դեմ է. հայը հային չպիտի սպանի: 23 տոկոսը կողմ է. երբ իշխանությունը համը հանում է, բոլորը պետք է զինվեն: Իսկ հարցման մասնակիցների մեծամասնությունը` 32 տոկոսը, կտրականապես դեմ է. դա մեր երկրի անվտանգությանը սպառնացող վտանգ է:
ԱՄԻ ՉԻՉԱԿՅԱՆ
