«ՀՀ-ն ԵՏՄ-ում հանդես է գալիս որպես հարթակ՝ Իրան-ի եւ ԵՏՄ-ի միջեւ կապ հաստատելու համար: Իրանի հնարավորություններն են այսպես մեծանում: ԵՏՄ-ում իրանական բիզնեսի հանդեպ նոր պահանջարկ կձեւավորվի»,-«Բլից ինֆո» մամուլի ակումբում այսօր անդրադառնալով ՀՀ նախագահի հայտարարությանը, որ ՀՀ-ն ԵՏՄ անունից բանակցություններ է վարում Իրանի հետ, ասաց իրանագետ Կարեն Մկրտչյանը:
Ինչ վերաբերում է ՀՀ տարածքով իրանական գազը Եվրոպա տարանցելու հնարավորություններին, նա ընդգծեց, որ Իրանն ընդամենը վերջին տարիներն է թոթափել ԵՄ-ի եւ ԱՄՆ-ի պատժամիջոցները: «Դրանք պետք չէ կապել հայ-իրանական հարաբերությունների հետ: ՀՀ-ի եւ Իրանի միջեւ հեռանկարային է զարգացումը բոլոր ոլորտներում: Այլ է հարցը, որ նման ծրագրերը նոր են սաղմնավորվում»,-ասաց Կարեն Մկրտչյանը:
Անդրադառնալով ԱՄՆ-ի՝ Իրանի դեմ նոր պատժամիջոցներին, փորձագետը նշեց, որ ԱՄՆ-ն շարունակում է հակաիրանական քաղաքականությունը. «ԱՄՆ-ի եւ Իրանի միջեւ լիարժեք հարաբերություններ գոյություն չունեն, դրանք միջնորդավորված են: Ժամանակ առ ժամանակ ԱՄՆ-ի կողմից պատժամիջոցների կիրառումը խոչընդոտում է Իրանին՝ լիարժեք տնտեսական հարաբերություններ հաստատելու հարեւան երկրների հետ»:
Մկրտչյանի բնորոշմամբ՝ քանի դեռ ԱՄՆ-ի կողմից առկա է Իրանի դեմ պատժամիջոցների կիրառում, Իրանի կողմից տնտեսական թուլություն կնկատվի. «Սակայն ԵՄ-ի հետ ՀՀ-ի սերտ հարաբերությունները Իրանին թույլ են տալիս խորացնել հարաբերությունները ՀՀ-ի հետ»:
Լուիզա ՍՈՒՔԻԱՍՅԱՆ
