Oգոստոսի 4-ին «Տեսակետ» մամուլի ակումբի հյուրն էր ԵՊՀ պատմության ֆակուլտետի դեկան Էդիկ Մինասյանը: Նա խոսեց այն մասին, թե ինչպես է ավանդաբար ԵՊՀ Պատմության ֆակուլտետի շրջանավարտների դիպլոմների հանձնումն իրականացնում Աղթամարի Սուրբ Խաչ եկեղեցում:
Նա փաստեց, որ Թուրքիայի տարածքում գտնվող հայկական հուշարձաններն անմխիթար վիճակում են: Պատմաբանի հավաստմամբ, քիչ թե շատ բարվոք վիճակում է Անիի Ամենափրկիչը, այն էլ այն պատճառով, որ ՅՈՒՆԵՍԿՕ-ի հովանու ներքո է եւ թուրքերը պատրաստվում են այն վերականգնել: «Ինչ վերաբերում է սուրբ Գրիգոր եկեղեցուն, այն վերականգնվել է, բայց միախառնված է թուրքական ոճի հետ»,-հավելեց ԵՊՀ պատմության ֆակուլտետի դեկանը:
Նրա տեղեկացմամբ, որոշ եկեղեցիների տարածքում արոտավայր է կամ թռչնաշուկա. «Կիսաքանդ վիճակում էր Վարագավանքի եկեղեցին ու մյուսները… Թուրքերը քանդել էին բազմաթիվ եկեղեցիների հիմքեր` ոսկի փնտրելու մոլուցքով»:
ԵՊՀ պատմության ֆակուլտետի շրջանավարտ Գեղամ Ասատրյանն էլ հավելեց, որ տպավորված են յուրատեսակ ուխտագնացությամբ: Նա կարեւորեց, որ պատմության ֆակուլտետի ուսանողներին դիպլոմներ են հանձնվում պատմական Հայաստանի տարածքում: Երիտասարդը նույնպես մտահոգված էր հայկական հուշարձանների անխնամ վիճակով: Նա հայտնեց, որ շատ եկեղեցիների որմնանկարները միտումնավոր քերված են կամ սպիտակեցված: Գեղամ Ասատրյանը դա որակեց որպես բռնություն քրիստոնեական մշակույթի հանդեպ: Գեղամ Ասատրյանը ընդգծեց, որ Տիգրան Հոնենց եկեղեցու համարյա բոլոր որմնանկարները փորձել են մաքրել: Սա հայկական ճարտարապետության բացառիկ հուշարձան է եւ արտաքինից հիշեցնում է Անիի մայր տաճարը:
Գոհար ՀԱԿՈԲՅԱՆ
