«Սեֆիլյանի եւ մյուսների» գործով դատական նիստի ընթացքում այսօր ամբաստանյալներից Ներսես Պողոսյանի պաշտպան Նինա Կարապետյանցը լրագրողների հետ զրույցում ահազանգեց, որ դատարանի կարգադրիչները գրանցում են նիստին ներկա գտնվել ցանկացող քաղաքացիների տվյալները:
«Անձնական տվյալներ են հավաքում՝ արդեն երկու ամիս: Նույնը վերաբերում է նաեւ «Սասնա ծռերի» գործին: Ինչո՞ւ դատախազությունն ու քննչական ծառայությունը չեն արձագանքում խնդրին»,-ասաց Կարապետյանցը:
Նշենք, որ դատարան մուտք գործելիս կարգադրիչները գրանցում են քաղաքացու տվյալներն ըստ անձնագրի:
Նինա Կարապետյանցը նկատեց, կարգադրիչները քաղաքացիներից անգամ հարցնում են, թե ո՞ր ամբաստանյալների ազգականներն են, ո՞ւմ համար են եկել: «Քեզ ի՞նչ՝ ում համար են եկել…Ազատ դատ է՝ եկել են»,-դժգոհեց նա:
Ինչ վերաբերում է ՀՀ դատական դեպարտամենտի ղեկավար Կարեն Փոլադյանի հայտարարությանը, թե օրվա վերջում այդ ցուցակները վերացվում են, Կարապետյանցն այսպես արձագանքեց. «Նրա ասածը հիմնազուրկ է»:
Մանրամասն՝ տեսանյութում:
Լուիզա ՍՈՒՔԻԱՍՅԱՆ
