«Սեֆիլյանի եւ մյուսների գործով» դատական նիստում այսօր դատավոր Տաթեւիկ Գրիգորյանը որոշեց սանկցիայի ենթարկել ամբաստանյալ Ներսես Պողոսյանի պաշտպան՝ փաստաբան Նինա Կարապետյանցին՝ համապատասխան գրությամբ դիմելով ՀՀ փաստաբանների պալատին:
Հետո դատարան բերվեց Ներսես Պողոսյանը՝ կարծիք արտահայտելու: Հիշեցնենք, որ դատարանի հանդեպ անհարգալից վերաբերմունքի համար նա որոշակի ժամանակով հեռացված է նիստերից:
Ամբաստանյալը հաստատեց, որ իր պաշտպաններն են Նինա Կարապետյանցը եւ Արայիկ Պապիկյանը. «Նրանք ոչ թե չեն գալիս, այլ դուք չեք թողնում: Ես այլ պաշտպանի չեմ ցանկանում, մնացածը դուք որոշեք…»,-դիմելով դատավորին՝ ասաց նա: Այնուհետեւ Պողոսյանը դուրս տարվեց դահլիճից:
Դատավորն էլ որոշեց նրա, ինչպես նաեւ՝ Ժիրայր Սեֆիլյանի համար հանրային պաշտպան ներգրավելու նպատակով դիմել ՀՀ փաստաբանների պալատի հանրային պաշտպանի գրասենյակին:
Նիստը հետաձգվեց եւ նշանակվեց հաջորդ ուրբաթ՝ ժամը 11-ին: Այս գործով նիստերը դատավորի որոշմամբ կայանում են ամեն ուրբաթ: Քաղաքացիները կրկին դժգոհեցին. «Սա դատ չի, ջուրծեծոցի է»:
Լուիզա ՍՈՒՔԻԱՍՅԱՆ
