«Վեոլիա ջուր» ընկերությունը մտադիր է ջրի սակագինը բարձրացնել: Այս մասին ընկերությունն է հայտարարություն արել: Նշենք, որ «Վեոլիա ջուր»-ը ամբողջ Հայաստանի խմելու ջրի միակ ջրամատակարարման օպերատորն է, որն առաջիկայում դիմելու է հանրային ծառայությունները կարգավորող հանձնաժողովին՝ վերանայելու ջրի սակագինը:
Հիշեցնենք, որ դեռեւս 2016 թվականի նոյեմբերի 21-ին լրագրողների հետ հանդիպման ժամանակ «Վեոլիա գրուպի» կենտրոնական եւ արեւելյան Եվրոպայի գոտու փոխնախագահ, Հայաստանի ծրագրի պատասխանատու Մալիկա Գենդուրին հայտարարել էր ջրի թանկացման հավանականության մասին: Այն ժամանակ Գենդուրին վստահեցրել էր, ջրի սակագինը կբարձրանա ծիծաղելի չափով:
Այժմ 1 խ/մ. ջրի արժեքը 180 դրամ է, «Վեոլիա ջուր» ընկերության առաջարկած գինը՝ 194.3 դրամ է, իսկ խոշոր բաժանորդների համար սակագինը 54 դրամ է, որի սակագինն էլ առաջարկվում է դարձնել 58.3-ի:
Արտակ Մանուկյան
Տնտեսագետ Արտակ Մանուկյանն Aravot.am-ի հետ զրույցում ասաց, որ ջրի սակագնի բարձրացումը սպասելի էր եւ համեմատաբար օբյեկտիվ է: Սակայն, ջրի թանկացմանը, ինչպես վստահեցրեց տնտեսագետը, 2018 թվականին հետեւելու է գազը, ապա՝ էլեկտրաէներգիան:
Նելլի ԲԱԲԱՅԱՆ
