Օգոստոսի 3-ին կկայանա ՀՀ կինոգործիչների միության վարչության նիստը: Կինոգործիչների միության ներկայիս փաստացի ղեկավար` միության քարտուղար Ռուդոլֆ Վաթինյանից Aravot.am-ը հետաքրքրվեց` նիստը բա՞ց է լրատվամիջոցների համար, կարո՞ղ ենք այն լուսաբանել:
«Ոչ… ճիշտ չի լինի, որ ներկա լինեք»,- ասաց նա:
Հարցրինք` կա՞ որեւէ նորմ, որն արգելում է ԶԼՄ-ներին լուսաբանել կինոմիության աշխատանքը, տվյալ դեպքում` նիստը:
«Բայց ի՞նչն է ձեզ հետաքրքրում»,- չհանձնվեց Ռուդոլֆ Վաթինյանը:
«Օրինակ, ուզում ենք իմանալ` թե ինչպես ամեն ինչ կհանգուցալուծվի»,- պնդեցինք մենք:
«Ի՞նչ հանգուցյալ»,-զարմացավ Ռուդոլֆ Վաթինյանը:
«Հանգուցյալ չէ, ասում եմ` ուզում ենք իմանալ, թե ինչպես ամեն ինչ կհանգուցալուծվի, կլինի՞ կինոգործիչների միության արտահերթ համագումար, թե՞ ուղղակի նախագահի պաշտոնակատար կնշանակվի` մինչեւ 2018թ կայանալիք հերթական համագումարին միության նոր նախագահի ընտրվելը»,- շարունակեցինք մենք:
«Ես ձեզ միայն ասում եմ` կլինի արտահերթ համագումար, համագումարն էլ կընտրի»,-ասաց Կինոգործիչների միության քարտուղարն ու անջատեց լսափողը:
Հիշեցնենք, որ ի թիվս այլոց, կինոգործիչների միության նախագահի պաշտոնին հավակնում են միության հանգուցյալ նախագահի որդին` Վահե Գեւորգյանցը եւ Կինոկենտրոնի նախկին տնօրեն Գեւորգ Գեւորգյանը:
Գոհար ՀԱԿՈԲՅԱՆ
Լուսանկարը` armkinomania.wordpress.com-ից
