2016թ. ոստիկանության ՊՊԾ գունդը գրաված «Սասնա ծռեր» զինված խմբի անդամներից 14-ի գործով դատական նիստը վերսկսվելուն պես դատավոր Արտուշ Գաբրիելյանը որոշեց սանկցիա կիրառել փաստաբաններ Արայիկ Պապիկյանի, Հրանտ Գեւորգյանի, Հարություն Բաղդասարյանի եւ Դավիթ Գյուրջյանի հանդեպ, որոնք ավելի վաղ լքել էին նիստերի դահլիճը:
Այնուհետեւ դատավորի որոշմամբ «Սասնա ծռեր» զինված խմբի համակիրներից մեկը հեռացվեց նիստերի դահլիճից՝ մինչեւ դատավարության ավարտը: Ըստ դատական կարգադրիչի գրության՝ ապակե պատնեշից այսկողմ գտնվող կինը պարբերաբար անպարկեշտ արտահայտություններ եւ հայհոյանքներ է հնչեցրել դատարանի հասցեին: Կինը, սակայն, բղավեց, որ կարգադրիչը սուտ է խոսում, ինքը չի հայհոյել: Դատարանի կարգադրիչները կնոջը դուրս հրավիրեցին:
Ամբաստանյալների պաշտպանները առարկեցին դատարանի որոշման դեմ, ասելով, որ նա ապակե պատնեշից այսկողմ չէր կարող լսել, թե ինչ են ասում քաղաքացիները:
Պաշտպաններից Արա Զաքարյանն էլ դատավորի առաջարկով մի պահ դուրս եկավ քաղաքացիների մոտ հայհոյանք լսելու, սակայն այդպես էլ չլսեց:
Այնուհետեւ սանկցիայի ենթարկված ամբաստանյալ Արեգ Կյուրեղյանը մի պահ բերվեց դահլիճ՝ կարծիք արտահայտելու պաշտպանի մասին: Թեեւ նա չհրաժարվեց իր պաշտպան Մուշեղ Շուշանյանից, սակայն դատավորի որոշմամբ որպես հանրային պաշտպան ներգրավվեց Սյուզաննա Խչեյանը: Նա սակայն նշեց, որ Կյուրեղյանը չի ցանկանում այլ պաշտպան ունենալ եւ դուրս եկավ նիստերի դահլիճից: Դատավորը կրկին ընդմիջեց նիստը՝ Խչեյանի հանդեպ սանկցիա կիրառելու հարցը քննարկելու համար:
Լուիզա ՍՈՒՔԻԱՍՅԱՆ
