2016թ. Ոստիկանության ՊՊԾ գունդը գրաված «Սասնա ծռեր» զինված խմբի անդամներից 14-ի գործով դատական նիստը վերսկսվելուն պես՝ այսօր ամբաստանյալների պաշտպաններից Հարություն Բաղդասարյանը եւ Հրանտ Գեւորգյանը հայտարարեցին՝ քանի որ դատարանը մերժեց սանկցիայի ենթարկված ամբաստանյալներին նիստերի դահլիճ վերադարձնելու միջնորդությունը, իրենք դուրս են գալիս դահլիճից, քանի որ իրենց պաշտպանյալ Պավել Մանուկյանը հրահանգել է առանց իր ներկայության նիստերի չմասնակցել:
Դատավորը հիշեցրեց՝ պաշտպանները պարտավոր են ներկա լինել, եթե իրենց ամբաստանյալներն, ըստ սանկցիայի, հեռացված են նիստերից. «Դուք նրանց պաշտպաններն եք, բա էլ ի՞նչ եք, եթե գնում եք ու չեք պաշտպանում նրանց»:
Պաշտպանները, սակայն, նախընտրեցին հեռանալ: «Դուք յուրովի եք մեկնաբանում օրենքը: Տեսականորեն մենք ենք ձգձգում նիստը, բայց դա ձեր մեղքով է, քանի որ դուք եք խաղի կանոն թելադրում, դուք եք մեղավոր»,-հայտարարեց Հարություն Բաղդասարյանը:
Նա եւ Հրանտ Գեւորգյանը դուրս եկան նիստերի դահլիճից, նրանց հետեւեցին Դավիթ Գյուրջյանն ու Արայիկ Պապիկյանը: Նիստը կրկին ընդմիջվեց՝ նշյալ փաստաբանների հանդեպ սանկցիա կիրառելու հարցը քննարկելու համար:
Լուիզա ՍՈՒՔԻԱՍՅԱՆ
