2016թ. Ոստիկանության ՊՊԾ գունդը գրաված «Սասնա ծռեր» զինված խմբի անդամներից 14-ի գործով դատական նիստից առաջ հերթական միջադեպը տեղի ունեցավ դատարանի կարգադրիչների եւ ամբաստանյալների պաշտպաններից Արայիկ Պապիկյանի միջեւ:
Նրա պայուսակի զննության ժամանակ մետաղորսիչ սարքն ազդանշան տվեց, սակայն փաստաբանը հրաժարվեց ցույց տալ այն՝ ասելով, որ իր պայուսակում արգելված իր չկա, իսկ կարգադրիչն իրավունք չունի իրեն ապօրինի պահանջ ներկայացնել:
Կարգադրիչը պնդեց, ինքն օրենքով կարող է որոշել՝ այդ պահին ո՞ր իրը կարող է համարվել վտանգավոր: Տեւական քննարկումից հետո փաստաբանն ի վերջո դատարկեց պայուսակի պարունակությունը՝ փաստաթղթեր, նոթատետր: Պարզվեց, որ ազդանշան տվողը գրիչն էր՝ մետաղական մասով:
«Ես վերջին անգամ եմ նման բան անում, դուք բոլորի առաջ նվաստացրիք ինձ: Ձեր ապօրինի գործողությունների պատճառով ես արդեն 10-ից ավելի սանկցիա ունեմ»,-դիմելով կարգադրիչին՝ ասաց Արայիկ Պապիկյանը:
Կարգադրիչն էլ հիշեցրեց, որ իրենց օրենքով սահմանված զննություն են կատարում, ոչ թե խուզարկություն, ինչպես փաստաբաններն են պնդում:
Լուիզա ՍՈՒՔԻԱՍՅԱՆ
