Վրաստանի նախկին նախագահ, Օդեսայի նախկին նահանգապետ Միխեիլ Սաակաշվիլին հայտարարել է, որ չի պատրաստվում քաղաքական ապաստան փնտրել ԱՄՆ-ում կամ այլ երկրում և կվերադառնա Ուկրաինա, որպեսզի շարունակի իր քաղաքական պայքարը: Այս մասին Սաակաշվիլին հայտնել է տեսազանգով հրավիրված ասուլիսի ժամանակ:
«Ես չեմ պատրաստվում օգտվել ԱՄՆ-ի կամ այլ երկրի պաշտպանությունից, ես պատրաստվում եմ վերադառնալ Ուկրաինա և հենվել մեր ակտիվիստների վրա»,- ասել է Սաակաշվիլին:
Նա նշել է, որ վերադառնալու ժամկետը կհայտարարի ավելի ուշ, բայց կվերադառնա ոչ թե «թաքուն», այլ բացահայտ և հանրային կերպով:
Քաղաքական գործիչը չի բացառել, որ Ուկրաինայի իշխանությունները կարող են թույլ չտալ իրեն մուտք գործել երկրի տարածք, ավելին, կարող են ձերբակալել և արտահանձնել Վրաստանին:
«Ես վստահ եմ, որ ճիշտ եմ: Ես հենվում եմ Ուկրաինայի քաղաքացիների օրինավորության վրա, որոնք թույլ չեն տա նման կամայականություն: Ես ճիշտ եմ, ես թաքցնելու ոչինչ չունեմ, և կարևորը, ես ոչ թե ինձ եմ պաշտպանում, այլ ցանկանում եմ պաշտպանել կամայականություններից: Եկեք մտածենք լավի մասին, բայց պատրաստ լինենք վատի: Ես պատրաստ եմ, բայց կարծում եմ, որ ի վերջո, ճիշտը կհաղթի»,- ասել է Սաակաշվիլին:
Պատրաստեց՝ Վիկտորյա ԱՆԴՐԵԱՍՅԱՆԸ
