Դատապարտյալների վաղաժամկետ պայմանական ազատ արձակման նոր հանձնաժողովը մերժել է «Արմավիր» ՔԿՀ դատապարտյալ, ապրիլյան քառօրյայի մասնակից, ազատամարտիկ Սամվել Մելքոնյանին: Այս մասին մեզ ասաց խմբագրություն զանգահարած նրա եղբայրը` Մանվել Մելքոնյանը:
Ազատամարտիկը մեղավոր է ճանաչվել ՀՀ քրօրենսգրքի 268 հոդվածի 2-րդ մասով` թմրամիջոցների ապօրինի վերամշակում, պահում` առանց իրացման նպատակի եւ դատապարտվել 1 տարի 6 ամիս ժամկետով ազատազրկման:
«Թալինի փողոցներից մեկում պլանի թուփ է տեսել`քաղել է ու բռնվել: Կռվող տղա է: Դատարանում ասաց, որ օգտագործում է մեկ-մեկ»,-պատմեց եղբայրը:
Արցախյան ազատամարտում ձեռքից վիրավորվել է, 2-րդ կարգի հաշմանդամ է ու, չնայած դրան՝ ապրիլյան պատերազմին սահմանում էր:
«3 ամիս առաջ նախկին հանձնաժողովը կտրեց .ասինք՝ լավ օրենքը փոխվում է, նոր հանձնաժողովը կազատի, բայց տարբերություն չկա: Էլ խի՞ են խաբում ժողովրդին»,-ասաց Մանվելը:
Նրա խոսքով՝ 8 ամիս է մնում, որ եղբայրը ազատվի ու չունի ոչ մի տույժ, նկատողություն:
Եղբայրների հույսը դատարան է`անկախ հանձնաժողովի որոշումը վիճարկելու են:
Դավիթ ԱՐՄԵՆՅԱՆ
