Շենգավիթ վարչական շրջանի ընդհանուր իրավասության դատարանում այսօր «Ժիրայր Սեֆիլյանի եւ մյուսների գործով» դատական նիստը չսկսված՝ հերթական միջադեպը տեղի ունեցավ փաստաբանի եւ կարգադրիչների միջեւ:
Ամբաստանյալ Ներսես Պողոսյանի պաշտպան, փաստաբան Նինա Կարապետյանցը ներս չմտավ դահլիճ եւ համապատասխան գրություն թողեց դատավորին: Խնդիրը նույնն էր՝ պայուսակի զննության ժամանակ մետաղորսիչ սարքն ազդանշան տվեց. փաստաբանը պնդեց, որ չի պատրաստվում պայուսակի պարունակությունը դատարկել. փաստաթղթերը մետաղական ամրաններ ունեն:
Նինա Կարապետյանը լրագրողների հետ զրույցում ասաց, որ դատարանի կարգադրիչներն իրենց ոչ թե զննում են, այլ խուզարկում:
«Տեղեկություններ տարածվեցին, որ 2018թ. դատական դեպարտամենտը սքաներներ է ձեռք բերելու եւ տեղադրելու դատարաններում: Ի՞նչ անենք, միջնորդենք, որ մինչեւ 2018թ.-ը նիստը հետաձգե՞ն, որ այս աննորմալ վիճակը չլինի՞…կամ էլ միջոցներ պետք է ձեռնարկել, որպեսզի փաստաբանները չխուզարկվեն»,-նշեց Նինա Կարապետյանցը:
Լուիզա ՍՈՒՔԻԱՍՅԱՆ
