2016թ. ոստիկանության ՊՊԾ գունդը գրաված «Սասնա ծռեր» զինված խմբի անդամներից 18-ի գործով հերթական դատական նիստը վերսկսվելուն պես այսօր դատավոր Արտուշ Գաբրիելյանը որոշեց մերժել ավելի վաղ ամբաստանյալ Արամ Մանուկյանի ներկայացրած իր ինքնաբացարկի միջնորդությունը:
Այնուհետեւ դատավորը հայտարարեց, որ ամբաստանյալների պաշտպաններից Մուշեղ Շուշանյանը եւ Կարապետ Բադալյանը այդպես էլ նիստին չեն ներկայացել եւ քանի որ դա կրկնվում է մի քանի նիստ, հաջորդ նիստում նրանց պաշտպանյալներ Սերգեյ Կյուրեղյանի, Գառնիկ Հովակիմյանի եւ Արթուր Սողոմոնյանի համար հանրային պաշտպաններ կներգրավվեն: «Իրենք ներկայանում են, դուք չեք թույլատրում մտնել»,- հայտարարեց ամբաստանյալներից Արթուր Սողոմոնյանը:
Այնուհետեւ ամբաստանյալներին, բացի Արամ Մանուկյանից, Հովհաննես Հարությունյանից եւ Գեւորգ Իրիցյանից, ոստիկաններն ուղեկցեցին նիստերի դահլիճից դուրս, քանի որ նրանք սանկցիայի էին ենթարկվել եւ հեռացված են նիստերից:
Հեռանալիս ամբաստանյալներից Մարտիրոս Հակոբյանը՝ հայտնի «Դեդ» անունով, դիմելով դատավորին, ասաց. «Ես հասկացա, որ ոչ միայն մեխն ու մուրճն է ձեր ձեռքին, այլեւ թուղթն ու գրիչը՝ ոնց ուզում գրում-մրում եք»:
Դատավորն արդեն որերորդ անգամ ընդմիջեց նիստը փաստաբաններ Մուշեղ Շուշանյանի եւ Կարապետ Բադալյանի առնչությամբ սանկցիա կիրառելու որոշումը քննարկելու համար:
Վերադառնալով խորհրդակցական սենյակից, դատավորը որոշեց նշյալ փաստաբաններին սանկցիայի ենթարկելու գրությամբ դիմել Փաստաբանների պալատին:
Հաջորդ նիստը նշանակվեց մյուս հինգշաբթի, ժամը 11-ին:
Լուիզա ՍՈՒՔԻԱՍՅԱՆ
