ՀՀ պետական կառավարման ակադեմիան և ՀՀ ԳԱԱ գիտակրթական միջազգային կենտրոնը ՀՀ ԿԳՆ-ի կողմից իրավունք են ստացել առաջին անգամ ՀՀ-ում իրականացնել մագիստրոսական կրթական ծրագիր` հեռավար ձևաչափով: Ուսուցումը սկսվելու է 2017-ի սեպտեմբերից: Տևողությունը 2.5 տարի: Ցանկացողները փաստաթղթերը պետք է ներկայացնեն մինչև սեպտեմբերի 20-ը: Իսկ դասընթացները կսկսեն սեպտեմբերի 25-ից:
«Մեդիա կենտրոնում» հրավիրված քննարկմանը ՀՀ պետական կառավարման ակադեմիայի պրոռեկտոր Թերեզա Խեչոյանը տեղեկացրեց, որ ուսուցումն իրականացվելու է հայերենով, և արդեն ունեն մեկ սիրիահայ դիմորդ ԱՄՆ-ից. «Նա գործարար է, սովորելու է գործարար վարչարարություն և հետաքրքրված է այդ կրթությամբ` գիտակցելով դրա անհրաժեշտությունը»:
Տիկին Խեչոյանը կարևորեց այն, որ արդեն գոյություն ունի հեռավար ուսուցման կարգավորման իրավական փաստաթուղթ: Այնուհետև հավելեց, որ ընդունելության քննությունները կիրականացվեն հարցազրույցի միջոցով, իսկ ընդունված դիմորդները կհրավիրվեն մեկ կամ երկշաբաթյա դասընթացների. նրանց կուսուցանեն մուդլ հարթակներից օգտվելու եղանակները:
ՀՀ ԳԱԱ գիտակրթական միջազգային կենտրոնի արտաքին կապերի բաժնի պետ Արուսյակ Հարությունյանը պարզաբանեց, որ ծրագիրն ուղղված է բարձրագույն կրթության մատչելիության հասանելիության բարձրացմանը. «Սա նախատեսված է հասուն մարդկանց համար, որոնք ժամանակի առումով չեն հասցնում բարձրագույն և մագիստրոսական կրթություն ստանալ: Ցանկալի է, որ դիմորդն ունենա կրթական փորձ և կենսագրություն»:
ՀՀ պետական կառավարման ակադեմիայի պրոռեկտոր Խաչատուր Բեզիրջյանն էլ տեղեկացրեց, որ իրավական առումով հեռավար կրթության ավարտական վկայականը` դիպլոմը, դա նույնն է, ինչ բուհի դիպլոմը. «Հեռավար կրթությունն իրականացվելու է օնլայն և օֆլայն տարբերակով: Օնլայնն այն է, որ անմիջական ռեալ ժամանակի մեջ է սովորողը մասնակցում դասընթացին, իսկ օֆլայնի դեպքում նա կարող է մտնել կայք ու լսել: Հեռավար ուսուցմամբ հնարավորություն է ստեղծվում ավելի լայն խավերին ստանալ կրթություն: Դիմորդներ կարող են լինել նրանք, ովքեր զբաղված են, կարող են լինել զինծառայողները, բազմազավակ մայրերը, Արևմուտքում անգամ բանտարկյալներն են սովորում: Հեռավար կրթության վարձավճարն ավելի մատչելի է»:
ՀՀ պետական կառավարման ակադեմիայի իրավախորհրդատու Գայանե Հովհաննիսյանի վստահեցմամբ` խիստ պահանջներ են սահմանել. ամփոփիչ ատեստավորմանը, միջանկյալ քննություններին ուսանողը պետք է ֆիզիկապես ներկա գտնվի:
Տաթև ՀԱՐՈՒԹՅՈՒՆՅԱՆ
Լուսանկարը` «Մեդիա կենտրոն»-ի
