2016թ. Ոստիկանության ՊՊԾ գունդը գրաված «Սասնա ծռեր» զինված խմբի անդամներից 18-ի գործով այսօր նշանակված դատական նիստից առաջ դատարանի նախասրահում հերթական միջադեպը տեղի ունեցավ ամբաստանյալների պաշտպաններից մեկի եւ կարգադրիչների միջեւ:
Փաստաբան Անուշ Մխիթարյանի պայուսակի զննության ժամանակ մետաղորսիչ սարքն ազդանշան տվեց, սակայն փաստաբանը հրաժարվեց բոլորի աչքի առաջ դատարկել պայուսակի պարունակությունը եւ ցույց տալ, թե ինչ մետաղական իրեր կան: Փաստաբանը բարկացավ, ձայնը բարձրացրեց, ասաց, որ կարգադրիչները թող արգելված իրերի ցուցակ ներկայացնեն, որը գոյություն չունի: «Դուք՝ կարգադրիչներդ, արդեն շոու եք սարքում»,-նշեց Մխիթարյանը:
Փոքր-ինչ վիճաբանությունից հետո փաստաբանը կին-կարգադրիչի հետ հեռացավ առանձին սենյակ, որպեսզի բոլորի ներկայությամբ ստիպված չլինի պայուսակի պարունակությունը ցույց տալ: Նիստը սկսվելուն պես հետաձգվեց, քանի որ ամբաստանյալներին դեռ չեն բերել:
Լուիզա ՍՈՒՔԻԱՍՅԱՆ
