2016թ. Ոստիկանության ՊՊԾ գունդը գրաված «Սասնա ծռեր» զինված խմբի անդամներից 14-ի գործով դատական նիստն այսօր վերսկսվելուն պես դատավոր Արտուշ Գաբրիելյանը հայտարարեց, որ դատարանի հանդեպ անհարգալից վերաբերմունք դրսեւորելու եւ նիստին չներկայանալու համար սանկցիայի է ենթարկում ամբաստանյալների պաշտպաններ Արայիկ Պապիկյանին, Մուշեղ Շուշանյանին, Տիգրան Հայրապետյանին, Արա Զաքարյանին:
Հիշեցնենք՝ նրանք պատճառաբանել էին, թե կարգադրիչներն իրենց ոչ թե զննում են, այլ խուզարկում, իսկ դատավորն էլ պնդել էր, որ կարգադրիչները գործում են օրենքի սահմաններում:
Սանկցիայի ենթարկված փաստաբաններից Արա Զաքարյանը, որն այդ պահին արդեն ներկայացել էր նիստին, խնդրեց պարզաբանել իրեն սանկցիայի ենթարկելու պատճառը: Դատավորը հիշեցրեց, որ նա անհարգալից վերաբերմունք է դրսեւորում դատարանի հանդեպ: Զաքարյանին Արտուշ Գաբրիելյանը թույլ չտվեց խոսքը շարունակել: Փաստաբանը շարունակեց խոսել, ինչի համար նախազգուշացում ստացավ:
-Կարգադրիչները զեկուցել են, որ դուք հրաժարվել եք ներկայանալ նիստի, այդ պատճառով: Բավարարվա՞ծ եք,-ասաց դատավորը:
-Իհարկե՝ ոչ…դուք ապատեղեկացված եք,-պատասխանեց Արա Զաքարյանը:
Դատավորին չհաջողվեց լռեցնել Զաքարյանին, ինչի պատճառով նա 4-րդ անգամ ընդմիջեց նիստը՝ Արա Զաքարյանի հանդեպ սանկցիա կիրառելու հարցը քննարկելու համար:
Լուիզա ՍՈՒՔԻԱՍՅԱՆ
