«Սեֆիլյանի եւ մյուսների գործով» դատական նիստը վերսկսվելուն պես այսօր նախագահող դատավոր Տաթեւիկ Գրիգորյանը որոշեց սանկցիայի ենթարկել ամբաստանյալ Ժիրայր Սեֆիլյանի պաշտպան Արա Զաքարյանին եւ ամբաստանյալ Ներսես Պողոսյանի պաշտպան Նինա Կարապետյանցին, որոնք ավելի վաղ լքել էին նիստերի դահլիճը:
Այնուհետեւ դատարան բերվեց ամբաստանյալներից Գալուստ Գրիգորյանը, որը եւս նիստերից հեռացվելու սանկցիայի է ենթարկված: Դատավորը հայտնեց, որ որպես նրա պաշտպան է ներգրավվում հանրային պաշտպան Աննա Ջուվանովան, քանի որ Գրիգորյանի նախկին պաշտպանի աշխատանքային պայմանագրի ժամկետը լրացել է:
Գրիգորյանն ասաց, որ առհասարակ պաշտպան չի ուզում ունենալ, իրեն պաշտպան պետք չէ: Դատավորը հակադարձեց՝ նա չի կարող հրաժարվել պաշտպանից, քանի որ սանկցիայի է ենթարկված: Գալուստ Գրիգորյանը զարմացավ՝ «Այդ դեպքում ինչո՞ւ եք ինձ կանչել»:
Աննա Ջուվանովան էլ իր հերթին նկատեց՝ ամբաստանյալը չի ուզում պաշտպան ունենալ, ուստի իր ներկայությունը հասկանալի չէ: Ջուվանովան ոչ թե հեռացավ դատարանից, այլ նստեց դահլիճի ապակե պատնեշից այս կողմ:
Դատավոր Տաթեւիկ Գրիգորյանը կրկին ընդմիջեց նիստը՝ այս անգամ Ջուվանովայի հանդեպ սանկցիայի հարցը քննարկելու համար: Փաստաբանը լրագրողների հետ զրույցում նկատեց՝ եթե դատավորը իրեն էլ սանկցիայի ենթարկի, դա կլինի ապօրինի որոշում, քանի որ ինքը նիստերի դահլիճը չի լքել:
Մանրամասն՝ տեսանյութում:
Լուիզա ՍՈՒՔԻԱՍՅԱՆ
