2016թ. Ոստիկանության ՊՊԾ գունդը գրաված «Սասնա ծռեր» զինված խմբի անդամներից 18-ի գործով դատական նիստը վերսկսելուն պես այսօր նախագահող դատավոր Արտուշ Գաբրիելյանը որոշեց սանկցիա կիրառել ամբաստանյալների պաշտպաններից փաստաբաններ Արայիկ Պապիկյանի, Նինա Կարապետյանցի եւ Մուշեղ Շուշանյանի հանդեպ՝ համապատասխան գրությամբ դիմելով ՀՀ փաստաբանների պալատին:
Ավելի վաղ նրանք իրենց բացակայությունը հիմնավորում էին այն հանգամանքով, որ դատական կարգադրիչներն իրենց ոչ թե զննում են, այլ խուզարկում:
Պաշտպաններից Ինեսսա Պետրոսյանը կարծիք հայտնեց, որ կարգադրիչները խտրական վերաբերմունք են ցուցաբերում նշյալ փաստաբանների հանդեպ: Երվանդ Վարոսյանն էլ իր հերթին ասաց՝ «տպավորություն է, որ դատավորը մտադիր է առանց պաշտպանական կողմի դատավարություն իրականացնել»:
Դատավորն էլ չշարունակեց թեման՝ ասելով՝ «բազմիցս բացատրել ենք, թե որն է խուզարկությունը, եւ որը՝ զննությունը»:
Պաշտպանները բարձրացրին նաեւ դատական նիստերի դահլիճ ջրի շիշ բերելու հարցը: Դատավորն առարկեց՝ ասելով. «Դուք հիմա առաջարկում եք, որ ես թույլատրեմ ջրի շշեր բերեք դնեք սեղաններին: Պատկերացնո՞ւմ եք՝ նիստերի դահլիճը կդառնա ընդմիջման վայր՝ բուֆետ…»:
Դատավորն առաջարկեց՝ եթե փաստաբանները ջուր խմելու կարիք ունեն, ինքը կարող է թույլատրել այդ նպատակով դուրս գալ նիստերի դահլիճից: Պաշտպանները չհամաձայնեցին: «Դպրոցում չենք, որ ձեռք բարձրացնենք ու թույլտվություն խնդրենք»,-ասաց փաստաբան Գրիշա Բալասանյանը:
«Սասնա ծռեր» խմբի անդամներից 18-ի գործով նիստը հետաձգվեց եւ նշանակվեց հուլիսի 27-ին, ժամը 11-ին:
Լուիզա ՍՈՒՔԻԱՍՅԱՆ
ձեր վարքագիծի համաձայն, այո, ճիշդ էք՝ դուք դպրոցում չէք
մանկապարտէզում էք