Ոստիկանության ՊՊԾ գունդը գրաված «Սասնա ծռեր» զինված խմբի անդամներից 18-ի գործով հերթական դատական նիստում այսօր ամբաստանյալների պաշտպանները միջնորդություն ներկայացրին դատավորին առ այն, որ վերջինս պետք է վերանայի 16 ամբաստանյալների հանդեպ սանկցիայի որոշումը եւ թույլատրի նրանց բերել նիստերի դահլիճ: Հիշեցնենք, որ ամբաստանյալներ Արամ Մանուկյանից եւ Հովհաննես Հարությունյանից բացի, մյուս 16 ամբաստանյալները հեռացված են նիստերի դահլիճից՝ դատարանի հանդեպ անհարգալից վերաբերմունքի համար:
Չնայած մեղադրող կողմը առարկեց միջնորդության դեմ, դատավորը որոշեց այն բավարարել: Ըստ այդմ՝ նիստը ընդմիջվեց արդեն երկրորդ անգամ:
Մինչ այդ ամբաստանյալ Արամ Մանուկյանը դիրքորոշում հայտնելով միջնորդության վերաբերյալ, ասաց. «Մենք ապստամբություն ենք արել, մեր ապստամբությունը հիմա էլ շարունակվում է: Եթե մեր ընկերներին բերեք դատարան ու նրանք էլի ոտքի չկանգնեն, էլի 6 ժամով սանկցիա պետք է տա՞ք»:
Լուիզա ՍՈՒՔԻԱՍՅԱՆ
