Այսօր Հայաստանի զարգացման հիմնադրամի պատվիրակությունը գործադիր տնօրեն Արմեն Ավակ Ավակյանի գլխավորությամբ ժամանել է Արցախ: Օրվա առաջին կեսին պատվիրակությունը հանդիպում է ունեցել Արցախի զարգացման հիմնադրամի գործադիր տնօրեն Արտակ Միրզոյանի և աշխատակազմի հետ: Հանդիպման ընթացքում ստորագրվել է փոխըմբռնման հուշագիր երկու հիմնադրամների միջև՝ շարունակական և խորացված համագործակցություն շարունակելու համար:
Օրվա երկրորդ կեսին Հայաստանի զարգացման հիմնադրամի պատվիրակությունը հանդիպում է ունեցել արդեն արցախյան գործարարների հետ, որտեղ հիմնականում քննարկվել են հիմնադրամի կողմից ներդրումներ կատարելու և արցախյան արտադրանքի ծավալները մեծացնելու և արտահանելու գործում: Հանդիպման ընթացքում գործարարները ներկայացրել են իրենց արտադրությունները և խոսել առկա խնդիրների վերաբերյալ:
Aravot.am-ի հետ զրույցում Հայաստանի զարգացման հիմնադրամի տնօրեն Արմեն Ավակ Ավակյանը ասաց, որ օրվա ընթացքում այցելել են մի քանի արտադրամասեր և իր գնահատմամբ զարգացման հեռանկարներ կան:
«Այժմ հանդիպումը գործարարների հետ նախատեսված է՝ նախ նրանց ծանոթացնելու մեր գործունեությանը, և միևնույն ժամանակ նրանցից լսել, թե ինչ գործիքակազմ և օգնություն է անհրաժեշտ մեր կողմից՝ արտադրանքի արտահանման ծավալները մի քանի անգամ մեծացնելու համար: Մենք տեղական արտադրանքի արտահանման գծով շատ ակտիվ աշխատում ենք, արտասահմանում ունենք ցանց, որը զբաղվում է Հայաստանի արտադրողների արտադրանքի արտահանմամբ: Ուզում ենք Արցախը նույնպես ներգրավել այդ ցանցին»,- այցի նպատակների մասին պարզաբանում է Արմեն Ավակ Ավակյանը:
Արցախի զարգացման հիմնադրամի գլխավոր տնօրեն Արտակ Միրզոյանը իր հերթին նշում է, որ այս հանդիպումները իրենց դրական արդյունքները կտան ուղղված Արցախի ձեռնարկատիրական զարգացմանը. «Մենք կարևորում ենք Արցախի ներդրումային հիմնադրամի և Հայաստանի զարգացման հիմնադրամի սերտ համագործակցությունը՝ փորձի փոխանակման, տնտեսական զարգացմանն ուղված ծրագրերի մշակման ու իրացման հարցում և կարծում եմ, որ այսպիսի հանդիպումները կկրեն շարունակակն բնույթ»:
Դավիթ ԱԲԱՂՅԱՆ
